പ്രകൃതിദത്തകൃഷിക്കു പ്രാധാന്യം നൽകണം- ഗവർണർ

കഴക്കൂട്ടം : പ്രകൃതിദത്തമായ നിലയിൽ കാർഷികരീതികൾ മുന്നോട്ടുകൊണ്ടുപോകണമെന്ന് ഗവർണർ രാജേന്ദ്ര വിശ്വനാഥ് ആർലേക്കർ. രാസവളങ്ങളുടെ അമിതോപയോഗം മണ്ണിൻ്റെ ഗുണനിലവാരത്തെ ബാധിക്കുമെന്നും പ്രകൃതിദത്തകൃഷി കർഷകരുടെ വരുമാനം വർധിപ്പിക്കുമെന്നും ഗവർണർ പറഞ്ഞു.

ശ്രീകാര്യത്ത് കേന്ദ്ര കിഴങ്ങുവിള ഗവേഷണകേന്ദ്രത്തിന്റെ(സിടിസിആർഐ) 62-ാം സ്ഥാപകദിനാഘോഷം ഉദ്ഘാടനം ചെയ്യുകയായിരുന്നു അദ്ദേഹം.

ലബോറടികൾക്കുള്ളിൽ നടക്കുന്ന പരീക്ഷണങ്ങളുടെ ഉപഭോക്താക്കൾ രാജ്യത്തെ കർഷകരും ജനങ്ങളുമായിരിക്കണമെന്ന് ഗവർണർ പറഞ്ഞു. ശ്രീചിത്ര തിരുനാൾ ഇൻസ്റ്റിറ്റ്യൂട്ട് ഫോർ മെഡിക്കൽ സയൻസസ് ആൻഡ് ടെക്നോളജി ഡയറക്‌ടർ ഡോ. സഞ്ജയ് ബെഹാരി വിശിഷ്‌ടാതിഥിയായി. സിടിസിആർഐ ഡയറക്‌ടർ ഡോ. ജി. ബൈജു അധ്യക്ഷത വഹിച്ച ചടങ്ങിൽ വിള ഉത്പാദനവിഭാഗം മേധാവി ഡോ. ജി. സുജ, ഡോ. മകേഷ് കുമാർ തുടങ്ങിയവർ സംസാരിച്ചു. മികച്ച പ്രകടനം കാഴ്‌ചവെച്ച ജീവനക്കാർ, ഗവേഷകർ, കർഷകർ എന്നിവരെ ഗവർണർ ആദരിച്ചു.