വിദ്യാര്‍ത്ഥികളെ കൊണ്ട് വിരമിച്ച അധ്യാപകരുടെ 'പാദ പൂജ' ചെയ്യിച്ചു; സംഭവം ബന്തടുക്കയില്‍, പ്രതിഷേധം

കാസർകോട്: ബന്തടുക്കയില്‍ വിദ്യാർത്ഥികളെ കൊണ്ട് അധ്യാപകരുടെ പാദ പൂജ ചെയ്യിച്ചു. ബന്തടുക്ക കക്കച്ചാല്‍ സരസ്വതി വിദ്യാലയത്തിലാണ് സംഭവം. ഭാരതീയ വിദ്യാനികേതന്റെ കീഴില്‍ പ്രവർത്തിക്കുന്ന സ്കൂളാണിത്. വിരമിച്ച 30 അധ്യാപകരുടെ കാലില്‍ വിദ്യാർത്ഥികളെ കൊണ്ട് വെള്ളം തളിച്ച്‌ പൂക്കളിട്ട് പൂജ ചെയ്യിക്കുകയായിരുന്നു.

വിദ്യാർത്ഥികളെ നിലത്ത് മുട്ട് കുത്തിയിരുത്തിയ ചിത്രം പുറത്തുവന്നു. ശേഷം, കസേരയില്‍ ഇരിക്കുന്ന അധ്യാപകരുടെ കാലില്‍ പൂക്കളും വെള്ളവും തളിച്ച്‌ പൂജ ചെയ്ത് തൊട്ട് വന്ദിക്കാൻ ആവശ്യപ്പെടുകയായിരുന്നു. സംഭവത്തില്‍ പ്രതിഷേധം വ്യാപകമാവുകയാണ്. എസ്‌എഫ്‌ഐ അടക്കം രംഗത്ത് വന്നിട്ടുണ്ട്.