വിലക്കുമായി വനംവകുപ്പ്: പോകരുത് ഹിൽടോപ്പിലേക്ക്...കാട്ടാനയുണ്ട്

ഗൂഡല്ലൂർ: വിനോദസഞ്ചാരികളെയുൾപ്പെടെ നാടുകാണിയിലെ ഹിൽടോപ്പ് മലയിലേക്കുള്ള യാത്രയിൽനിന്ന് വനംവകുപ്പ് വിലക്കി. ഗൂഡല്ലൂർ- പന്തല്ലൂർ-സുൽത്താൻബത്തേരി അന്തസ്സംസ്ഥാനപാതയിൽ പാണ്ഡ്യാർ ടാൻടി എസ്റ്റേറ്റിന് സമീപമാണ് ഹിൽടോപ്പ് ഹിൽ, പാതയിൽനിന്നും 500 മീറ്റർ ദൂരത്തിൽ നടന്നാണ് സന്ദർശകർ ഹിൽടോപ്പിലെത്തി സൗന്ദര്യമാസ്വദിക്കുന്നത്. വനംവകുപ്പിന്റെ ഉടമസ്ഥതയിലുള്ള സ്ഥലത്ത് ആനത്താരയോട് ചേർന്നാണ് ഈ പ്രദേശമുള്ളത്.

കാട്ടാനശല്യം രൂക്ഷമായ പ്രദേശത്ത് പ്രവേശനം നേരത്തേതന്നെ വനംവകുപ്പ് വിലക്കിയിരുന്നു. എന്നാൽ, വനംവകുപ്പ് സ്ഥാപിച്ച വിലക്ക് ബോർഡ് വകവെക്കാതെ സഞ്ചാരികൾ എത്തുന്നത് ശ്രദ്ധയിൽപ്പെട്ടതോടെയാണ് പൂർണനിരോധനവുമായി വനംവകുപ്പ് രംഗത്തെത്തിയത്. വിലക്ക് ലംഘിച്ച് ഇവിടെ പ്രവേശിക്കുന്നവർക്കെതിരേ നിയമനടപടികൾ സ്വീകരിക്കുമെന്ന് വനംവകുപ്പ് അധികൃതർ അറിയിച്ചു.