കുടുംബശ്രീയെ പഠിക്കാൻ സിക്കിമിൽനിന്ന് 20 അംഗ സംഘം

തളിപ്പറമ്പ് കുടുബശ്രീയുടെ പ്രവർത്തനങ്ങൾ നേരിൽക്കാണാൻ സിക്കിമിൽനിന്നുള്ള 20 അംഗ സംഘം ഗ്രാമപ്പഞ്ചായത്തുകളിലെത്തി. കുറുമാത്തൂർ പഞ്ചായത്തിലെ സന്ദർശനം പൂർത്തിയാക്കി തിങ്കളാഴ്‌ച പട്ടുവം പഞ്ചായത്ത്, തളിപ്പറമ്പ് ബ്ലോക്ക് പഞ്ചായത്തോഫീസ് എന്നിവിടങ്ങൾ സന്ദർശിച്ചു.

കേരളമാതൃകയിൽ അയൽക്കൂട്ടം സിക്കിമിലുണ്ടെന്ന് സിക്കിമിലെ ബ്ലോക്ക് പ്രോജക്ട് മാനേജർ ടെഷറിങ് ചോഡ ലിപാച്ചെ പറഞ്ഞു. ഇവിടെനിന്ന് കുടുംബശ്രീയെക്കുറിച്ച് ഏറെ പഠിക്കാനുണ്ടെന്നും സംഘാംഗങ്ങൾ പറഞ്ഞു. പഞ്ചായത്തുകളിലെ വിവിധ കുടുംബശ്രീ യൂണിറ്റുകൾ സന്ദർശിച്ചു. സിക്കിമിൽ ജോലിചെയ്യുന്ന മലയാളി പ്രീത ബാലനും കൂടെയുണ്ടായിരുന്നു. പട്ടുവത്ത് ബ്ലോക്ക് പഞ്ചായത്ത് പ്രസിഡൻ്റ് പി. ശ്രീമതിയുടെ നേതൃത്വത്തിൽ സ്വീകരിച്ചു. പഞ്ചായത്തംഗങ്ങൾ, കുടുംബശ്രീയംഗങ്ങൾ എന്നിവർ പങ്കെടുത്തു.