ദേശീയപാതയുടെ പണി നടക്കുന്നിടത്ത് സമൂഹ വിരുദ്ധ ശല്യം

ഒഴിഞ്ഞ മദ്യക്കുപ്പികൾ അലക്ഷ്യമായി വലിച്ചെറിയുന്നു

പറവൂർ : പുതിയ ദേശീയപാത 66-ൻ്റെ പണി നടക്കുന്ന തോന്ന്യകാവുമുതൽ

വഴിക്കുളങ്ങര വരെയുള്ള ഭാഗത്ത് പകലും രാത്രിയും സമൂഹ വിരുദ്ധ ശല്യം. പണിപൂർത്തിയാകാത്ത ഉയരപ്പാതയുടെ ഭാഗങ്ങളിലിരുന്ന് യുവാക്കൾ ഉൾപ്പെടെയുള്ളവർ കൂട്ടംചേർന്ന് മദ്യപിക്കുന്നത് പതിവാക്കിയിട്ടുണ്ട്. മദ്യപാനത്തിനുശേഷം ഒഴിഞ്ഞ മദ്യത്തിൻ്റെ ചില്ലുകുപ്പികൾ സർവീസ് റോഡിലേക്കും പരിസരത്തേക്കും അലക്ഷ്യമായി വലിച്ചെറിയുന്നു. ഇതുമൂലം സർവീസ് റോഡിലൂടെ പോകുന്നവരും പരിസരവാസികളും ഭീഷണിയുടെ നിഴലിലാണ്.

ചില്ലുകുപ്പികൾ പൊട്ടിച്ചിതറുന്നതുമൂലം ഉണ്ടാകുന്ന അപകടങ്ങൾ വേറെയും. പകൽ സമയങ്ങളിൽപോലും ലഹരിമാഫിയ ഇവിടം കൈയടക്കുന്നു. ഈ ഭാഗത്ത് നിർമാണം പാതിവഴിയിൽ സ്‌തംഭിച്ചു കിടക്കുന്നതുമൂലമാണ് ഇവർ സ്വൈര്യവിഹാരം നടത്തുന്നത്. നാട്ടുകാരിൽ ചിലർ പോലീസിൽ പരാതിപ്പെട്ടപ്പോൾ വീഡിയോ ദൃശ്യം എടുത്ത് അയക്കാനാണ് പറയുന്നത്. ഈ ഭാഗത്ത് രാത്രിയും പകലും പോലീസ് പട്രോളിങ് വേണമെന്നാണ് ആവശ്യം. ദേശീയപാതയുടെ പണിനടക്കുന്ന തോന്ന്യകാവ്-വഴിക്കുളങ്ങര ഭാഗത്ത് മദ്യക്കുപ്പികൾ വലിച്ചെറിഞ്ഞ നിലയിൽ