സർഗാത്മകതയെ തൊട്ടുണർത്തി ഓർമ്മച്ചെപ്പ്

ചെറുവത്തൂർ കുഞ്ഞുമനസ്സുകളിലെ സർഗാത്മകതയെ തൊട്ടുണർത്തി അവധിക്കാലത്തെ അനഭവക്കുറിപ്പ്. സമഗ്ര ശിക്ഷ കേരളം ചെറുവത്തൂർ ബിആർസിയാണ് കുട്ടികൾക്കായി അവധിക്കാല അനുഭവക്കുറിപ്പ് മത്സരം സംഘടിപ്പിച്ചത്.

ഉപജില്ലയിലെ രണ്ടുമുതൽ ഏഴുവരെ ക്ലാസുകളിലെ കുട്ടികൾ മത്സരത്തിൽ പങ്കെടുത്തു. വിദ്യാലയങ്ങളിൽ ക്ലാസ് അടിസ്ഥാനത്തിൽ നടന്ന മത്സര വിജയികളുടെ രചനകളാണ് ഉപജില്ല തലത്തിൽ വിലയിരുത്തിയത്. ഉപജില്ലയിൽ ക്ലാസ് അടിസ്ഥാനത്തിൽ ആദ്യ രണ്ട് സ്ഥാനങ്ങൾ നേടിയ കുട്ടികൾക്ക് ബിആർസി അധികൃതർ വിദ്യാലയങ്ങളിലെത്തി സമ്മാനം കൈമാറി.

കുട്ടികളുടെ രചനകൾ ഉൾപ്പെടുത്തി 'ഓർമ്മച്ചെപ്പ് തുറക്കാം' പുസ്‌കവും പ്രസിദ്ധീകരിച്ചു. സികെഎൻഎസ് ജിഎച്ച്എസ് പിലിക്കോട്ട് നടന്ന ചടങ്ങിൽ ചെറുവത്തൂർ എഇഒ രമേശൻ പുന്നത്തിരിയൻ എച്ച്എം ഫോറം സെക്രട്ടറി പി.കെ. മുരളികൃഷ്‌ണന് കൈമാറി പ്രകാശനം ചെയ്‌തു. വി.വി. സുബ്രഹ്‌മണ്യൻ പുസ്ത‌ക പരിചയം നടത്തി. യു. സതീശൻ, കെ.വി. സൂര്യ, കെ. ശ്രുതി, വി.എം. സയന എന്നിവർ സംസാരിച്ചു.