അന്ധവിശ്വാസ ചൂഷണ നിരോധന നിയമത്തിൽനിന്ന് സർക്കാർ പിന്തിരിയരുത്- പരിഷത്ത്

കണ്ണൂർ : അന്ധവിശ്വാസ ചൂഷണനിരോധന നിയമം പാസാക്കുന്നതിൽനിന്ന് സർക്കാർ പിന്തിരിയരുതെന്ന് ശാസ്ത്രസാഹിത്യ പരിഷത്ത് ശാസ്ത്ര സാംസ്കാരികസംഗമം ആവശ്യപ്പെട്ടു. ഒരു ദശകമായി ഈ നിയമം നിർമിക്കാനുള്ള നടപടികൾ വിവിധ സർക്കാരുകളുടെ ഭാഗത്തുനിന്നുണ്ടായില്ല. ഇപ്പോഴാകട്ടെ, സർക്കാർ അതിൽനിന്ന് പിന്മാറിയിരിക്കുന്നു എന്നതാണ് കേരള ഹൈക്കോടതിയിൽ സമർപ്പിച്ച സത്യവാങ്‌മൂലം വെളിവാക്കുന്നത്. സർക്കാരിന്റെ ഈ പിന്മാറ്റം ആശങ്കയ്ക്ക് ഇടവരുത്തുന്നതും അങ്ങേയറ്റം പ്രതിഷേധാർഹവുമാണ് -സംഗമം വിലയിരുത്തി.

വി.കെ.കുഞ്ഞികൃഷ്‌ണൻ അധ്യക്ഷത വഹിച്ചു. കേന്ദ്ര നിർവാഹകസമിതി അംഗം വി.വി.ശ്രീനിവാസൻ, ജില്ലാ സെക്രട്ടറി ബിജു നിടുവാലൂർ, കെ.പി.രാമകൃഷ്ണ‌ൻ, പി.കെ.ഗോപാലകൃഷ്‌ണൻ, കെ.വി.രാമചന്ദ്രൻ, സതീശൻ കസ്‌തുരി, കെ.സൗമ്യ, പി.വി.മനോജ് കുമാർ, പി.കെ.സുധാകരൻ, മുൻകാല കലാജാഥാംഗങ്ങൾ എന്നിവർ സംസാരിച്ചു. സിനിമാപ്രദർശനവുമുണ്ടായി.