യോഗ സ്റ്റഡിസെൻറർ ആൻഡ് യൂത്ത് സെൻറർ കെട്ടിടം തുറന്നു

കുത്തുപറമ്പ് : മാങ്ങാട്ടിടം പഞ്ചായത്തിൻ്റെ സഹകരണത്തോടെ ആമ്പിലാട് സൗത്ത് പകൽ വയോജന വിശ്രമകേന്ദ്രത്തിന് മുകളിൽ നിർമിച്ച ഗ്രാമദീപം യോഗ സ്റ്റഡി സെൻറർ ആൻഡ് യൂത്ത് സെൻറർ കെട്ടിടം സ്‌പീക്കർ എ.എൻ. ഷംസീർ ഉദ്ഘാടനം ചെയ്തു. 40 ലക്ഷത്തോളം രൂപ ചെലവഴിച്ചാണ് യോഗ സ്റ്റഡിസെൻറർ കെട്ടിടം നിർമിച്ചത്. കെട്ടിടത്തിൽ ജിംനേഷ്യത്തിന് ആവശ്യമായ ഉപകരണങ്ങളും സജ്ജമാക്കിയിട്ടുണ്ട്.

മാങ്ങാട്ടിടം പഞ്ചായത്ത് പ്രസിഡൻ്റ് പി.സി. ഗംഗാധരൻ അധ്യക്ഷനായി. വിജേഷ് മാറോളി, എം. ഷീന, എൻ. അജീഷ്‌, ടി. ബാലൻ, പി.പി. രാജീവൻ, കല്ലിക്കണ്ടി വിനോദൻ, യോഗ പരിശീലക കെ. സപ്‌ന, എം. രഞ്ജിത്ത് തുടങ്ങിയവർ സംസാരിച്ചു. ആമ്പിലാട് എൽപി സ്‌കൂളിൽനിന്ന് വിരമിക്കുന്ന പ്രഥമാധ്യാപിക വി. സുരഭി, ആമ്പിലാട് പാറ അങ്കണവാടി വർക്കർ പി. പ്രസന്നകുമാരി എന്നിവരെ ആദരിച്ചു.