കേരള കോൺഗ്രസിന് കൂടുതൽ സീറ്റിന് അർഹത -മോൻസ് ജോസഫ്

ആലപ്പുഴ തദ്ദേശ തിരഞ്ഞെടുപ്പിൽ കേരള കോൺഗ്രസ് കൂടുതൽ സീറ്റുകളിൽ മത്സരിക്കുമെന്ന് പാർട്ടി എക്‌സിക്യൂട്ടീവ് ചെയർമാൻ മോൻസ് ജോസഫ് എംഎൽഎ പറഞ്ഞു. ജില്ലാ പ്രവർത്തക സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.

ജില്ലയിലെ എല്ലാ നിയോജകമണ്ഡലങ്ങളിലും പല പാർട്ടികളിൽനിന്നായി നേതാക്കൾ ഉൾപ്പെടെ നൂറുകണക്കിനു പ്രവർത്തകർ പുതുതായി പാർട്ടിയിൽ ചേർന്നെന്നും ബഹുജന അടിത്തറ വളർന്നതിനാൽ യുഡിഎഫിൽനിന്ന് ജില്ലാ പഞ്ചായത്ത് ഡിവിഷൻ ഉൾപ്പെടെ കൂടുതൽ സീറ്റുകൾ ലഭിക്കാൻ അവകാശമുണ്ടെന്നും അദ്ദേഹം പറഞ്ഞു.

ജില്ലാ പ്രസിഡന്റ്റ് ജേക്കബ് എബ്രഹാം അധ്യക്ഷനായി. റെജി ചെറിയാൻ, തോമസ് എം. മാത്തുണ്ണി, രാജൻ കണ്ണാട്ട്, സിറിയക്ക് കാവിൽ, മുരളി പരിയാത്ത്, ജോസഫ് മാത്യു, ബിജു കോയിക്കര, ജോയി കൊച്ചുതറ, ഷിബു ഉമ്മൻ തുടങ്ങിയവർ പ്രസംഗിച്ചു.