സ്ത്രീ അവകാശങ്ങളെക്കുറിച്ച് ജില്ലയിൽ അവബോധം കുറവ് -പി. സതീദേവി

കല്പറ്റ: സ്ത്രീകൾക്കുള്ള അവകാശങ്ങളെക്കുറിച്ച് കൃത്യമായ അവബോധം ജില്ലയിൽ കുറവെന്ന് സംസ്ഥാന വനിതാ കമ്മിഷൻ അധ്യക്ഷ അഡ്വ. പി. സതീദേവി. മറ്റുജില്ലകളെ അപേക്ഷിച്ച് താരതമ്യേന പരാതികൾകുറവുള്ള ജില്ലയാണ് വയനാടെന്നും പരാതികൾകുറയുന്നത് സ്ത്രീകളിലെ അവബോധക്കുറവുമൂലമാണെന്നും കമ്മിഷൻ അഭിപ്രായപ്പെട്ടു.

വരുന്നപരാതികളിൽ ഭൂരിഭാഗവും ഗാർഹികപീഡനം സംബന്ധിച്ചുള്ളതാണ്. കളക്ട‌റേറ്റ് കോൺഫ്രൻസ് ഹാളിൽ നടന്ന അദാലത്തിൽ 22 പരാതികൾ ലഭിച്ചു. രണ്ടെണ്ണം തീർപ്പാക്കി. 16 എണ്ണം അടുത്ത അദാലത്തിലേക്കുമാറ്റി. നാലുപരാതികളിൽ പോലീസിനോട് റിപ്പോർട്ടുതേടി. സംസ്ഥാന വനിതാ കമ്മിഷൻ അംഗം അഡ്വ. പി. കുഞ്ഞായിഷ, കൗൺസിലർമാരായ ഷിനു ജോർജ്, റിയാ റോസ്, സാമൂഹ്യനീതി വകുപ്പ് കൗൺസിലർ എം.എം. റീന എന്നിവരും പങ്കെടുത്തു.