ഹെറാൾഡ് കേസ്: സോണിയക്കും രാഹുലിനും നോട്ടീസയക്കാൻ വിസമ്മതിച്ച് കോടതി

ന്യൂഡൽഹി: നാഷണൽ ഹെറാൾഡ് കേസുമായി ബന്ധപ്പെട്ട് കോൺഗ്രസ് നേതാക്കളായ സോണിയാഗാന്ധിക്കും രാഹുൽഗാന്ധിക്കും ഇപ്പോൾ നോട്ടീസുനൽകാനാവില്ലെന്ന് ഡൽഹി കോടതി.

ഇരുവർക്കും നോട്ടീസയക്കണമെന്ന് ഇഡി ആവശ്യമുയർത്തിയപ്പോൾ കൂടുതൽ രേഖകൾനൽകാൻ കോടതി ആവശ്യപ്പെട്ടു. റൗസ് അവന്യു കോടതിയിലെ സ്പെഷ്യൽ ജഡ്ജി വിശാൽ ഗോഗ്നെയാണ് കേസ് പരിഗണിച്ചത്. ഉത്തരവ് നീട്ടരുതെന്നും നോട്ടീസ് നൽകണമെന്നുമാണ് ഇഡി ആവശ്യപ്പെട്ടത്.

എന്നാൽ, നോട്ടീസ് ആവശ്യമാണെന്ന് കോടതിക്ക് ബോധ്യപ്പെടുംവരെ ഉത്തരവിടാനാവില്ലെന്ന് ജഡ്‌ജി പറഞ്ഞു. ഇഡിയുടെ കുറ്റപത്രത്തിൽ ചിലരേഖകൾ കാണാനില്ല. ആ രേഖകളും ഹാജരാക്കണം. അതിനുശേഷം നോട്ടീസയക്കണോ എന്നതിൽ തീരുമാനമെടുക്കാമെന്നും കോടതി വ്യക്തമാക്കി. ഒന്നും മറയ്ക്കാനില്ലെന്നും നടപടികൾ സുതാര്യമാണെന്നും ഇഡി മറുപടിനൽകി. കേസ് വീണ്ടും മേയ് രണ്ടിന് പരിഗണിക്കും.