വ്യാപാര ലൈസൻസ് പുതുക്കാനാവാത്ത പ്രശ്‌നം; മന്ത്രിയുമായി ചർച്ചനടത്തി

രാമനാട്ടുകര : ഉടമകൾ കെട്ടിടനികുതി അടക്കാത്തതിൻ്റെ പേരിൽ വ്യാപാരികൾക്ക് ലൈസൻസ് പുതുക്കി നൽകാനാവാത്ത വിഷയത്തിൽ പരിഹാരമാവശ്യപ്പെട്ട് മന്ത്രി പി.എ. മുഹമ്മദ് റിയാസുമായി വ്യാപാരികൾ ചർച്ചനടത്തി.

സ്ഥാപനങ്ങളുടെ മുൻകാല ഫയലുകൾ 2025 ഫെബ്രുവരിയിൽ കെ സ്മ‌ാർട്ടിൻ അപ്‌പ്ലോഡ് ചെയ്യാത്ത കാരണത്താൽ രാമനാട്ടുകര നഗരസഭയിലെ 90 ശതമാനം സ്ഥാപനങ്ങളുടെ 2025-26 വർഷത്തെ വ്യാപാര ലൈസൻസ് പുതുക്കൽ പ്രതിസന്ധിയിലാണ്. വകുപ്പുമന്ത്രിയുടെ ശ്രദ്ധയിലെത്തിച്ച് പരിഹാരമുണ്ടാക്കുമെന്ന് മന്ത്രി അറിയിച്ചതായി വ്യാപാരികൾ പറഞ്ഞു.

വ്യാപാരി വ്യവസായി ഏകോപന സമിതി ഭാരവാഹികൾ ജില്ലാ പ്രസിഡൻ്റ് പി.കെ. ബാപ്പു ഹാജി, യൂത്ത് വിങ് സംസ്ഥാന പ്രസിഡൻ്റ് സലീം രാമനാട്ടുകര, രാമനാട്ടുകര യൂണിറ്റ് പ്രസിഡൻ്റ് പി.എം. അജ്‌മൽ, മറ്റു ഭാരവാഹികൾ തുടങ്ങിയവർ പങ്കെടുത്തു.