വേറിട്ട അനുഭവമായി സംഗീത സമന്വയം

പാലക്കാട്: ആസ്വാദകർക്ക് വേറിട്ട അനുഭവമായി സംഗീതസമന്വയം, കഥകളി സംഗീതത്തിലെയും ചലച്ചിത്രഗാനങ്ങളിലെയും രാഗഭാവങ്ങൾ കോർത്തിണക്കിയ വിരുന്നായിരുന്നു കലാകാരന്മാർ കാഴ്ചവെച്ചത്. ഓരോ രാഗത്തിലുമുള്ള കഥകളിപ്പദങ്ങളും ചലച്ചിത്രഗാനങ്ങളും അവതരിപ്പിച്ചു.

പാലക്കാട് കഥകളി ട്രസ്റ്റിൻ്റെ നേതൃത്വത്തിൽ ചെന്പൈസ്‌മാരക സംഗീതകോളേജിലെ എം.ഡി. രാമനാഥൻ ഹാളിലായിരുന്നു പരിപാടി. കഥകളിഗായകൻ നെടുന്‌പള്ളി രാംമോഹൻ, സദനം ജ്യോതിഷ്ബാബു, മീരാ രാംമോഹൻ എന്നിവർ കഥകളിപ്പദങ്ങളാലപിച്ചു.

കലാമണ്ഡലം രവിശങ്കർ (ചെണ്ട), കലാമണ്ഡലം വേണു (മദ്ദളം) എന്നിവർ പിന്നണിയേകി. പാലക്കാട് മിയാ മൽഹാറിൻ്റെ നേതൃത്വത്തിൽ നീതുവാര്യർ, നീനാവാര്യർ, രമ്യാവാര്യർ തുടങ്ങിയവർ ചലച്ചിത്രഗാനങ്ങളാലപിച്ചു.

ഷിജി കോഴിക്കോട് (കീബോർഡ്), ഉമേഷ് സായി (പാഡ്), ശശികുമാർ (തബല) തുടങ്ങിയവർ പിന്നണിയേകി. രജനീഷ് വാര്യരായിരുന്നു പരിപാടിയുടെ കോഡിനേറ്റർ.