ശ്രീനാരായണ ദർശനങ്ങൾ ഭരണഘടനാ നിർമിതിയെ സ്വാധീനിച്ചു -ചിഞ്ചുറാണി

മാന്നാർ : ഇന്ത്യൻ ഭരണഘടനാനിർമിതിയിൽ ശ്രീനാരായണഗുരുദേവന്റെ ആശയങ്ങളും ദർശനങ്ങളും ഏറെ സ്വാധീനിച്ചതായും ആ ദർശനങ്ങളുടെ ചുവടുപിടിച്ചാണ് സാമൂഹികനീതി ഉറപ്പാക്കുന്ന വകുപ്പുകൾ ഭരണഘടനയിൽ ഡോ.ബി.ആർ. അംബേദ്‌കർ എഴുതിച്ചേർത്തതെന്നും മന്ത്രി പിഞ്ചുറാണി പറഞ്ഞു.

മാന്നാർ എസ്എൻഡിപി യൂണിയനിലെ 3189-ാം നമ്പർ ഡോ. പൽപ്പു മെമ്മോറിയൽ ചെന്നിത്തല ശാഖാ ഗുരുക്ഷേത്രത്തിലെ പ്രതിഷ്‌ഠയുടെ പതിനഞ്ചാമത് വാർഷികത്തോടനുബന്ധിച്ച് നടന്ന ഒന്നാമത് ശ്രീനാരായണ കൺവെൻഷൻ ഉദ്ഘാടനം ചെയ്യുകയായിരുന്നു പിഞ്ചുറാണി. യൂണിയൻ കൺവീനർ അനിൽ പി. ശ്രീരംഗം അധ്യക്ഷനായി. യൂണിയൻ ജോ കൺവീനർ പുഷ്‌പാശശികുമാർ മുഖ്യപ്രഭാഷണം നടത്തി. മുതിർന്ന ശാഖാംഗങ്ങളെയും ഭാരവാഹികളെയും മന്ത്രി പുരസ്‌കാരം നൽകി ആദരിച്ചു.

അഡ് കമ്മിറ്റി അംഗങ്ങളായ രാജേന്ദ്രപ്രസാദ് അമൃത, പി.ബി. സൂരജ്, ഹരി പാലമൂട്ടിൽ, മേഖലാ ചെയർമാൻ കെ. വിശ്വനാഥൻ, കൺവീനർ പി. മോഹനൻ, വനിതാസംഘം യൂണിയൻ ചെയർപേഴ്‌സൺ ശശികലാരഘുനാഥ് വൈസ് ചെയർപേഴ്സ‌ൺ ബിനി സതീശൻ, കൺവീനർ വിജയലക്ഷ്‌മി, ട്രഷറർ പ്രവദാ രാജപ്പൻ എന്നിവർ സംസാരിച്ചു.

വൈകീട്ടു നടന്ന ശ്രീനാരായണ കൺവെൻഷനിൽ ഗുരുവിൻ്റെ ശാരദ അറിവിന്റെ ദേവത എന്ന വിഷയത്തിൽ ആശാപ്രദീപ് കോട്ടയം പ്രഭാഷണം നടത്തി. ശനിയാഴ്ച വൈകീട്ട് ഏഴിന് ശ്രീനാരായണ ധർമത്തിൽ അധിഷ്ഠിതമായ കുടുംബഭദ്രത എന്ന വിഷയത്തിൽ പ്രീതിലാൽ കോട്ടയവും സമാപനദിവസമായ ഞായറാഴ്ച‌ വൈകീട്ട് ഏഴിന് ഗുരു എന്തല്ല എന്ന വിഷയത്തിൽ ഡോ.എം.എം. ബഷീറും പ്രഭാഷണം നടത്തും.