സുന്ദരമാവാൻ ദൈവത്തിൻ്റെ സ്വന്തം നാട്

ചങ്ങനാശ്ശേരി സിപിഎം സംസ്ഥാനത്ത് നടത്തുന്ന സമ്പൂർണ ഖരമാലിന്യ ശുചിത്വയജ്ഞം പദ്ധതിയുടെ ഭാഗമായി മാലിന്യമുക്ത നവകേരളം പദ്ധതിക്ക് ചങ്ങനാശ്ശേരിയിൽ തുടക്കമായി. താലൂക്ക് ജനറൽ ആശുപത്രി പരിസരം ചങ്ങനാശ്ശേരി ഏരിയ കമ്മിറ്റി വൃത്തിയാക്കി. ജില്ലാ കമ്മിറ്റി അംഗം കെ.സി. ജോസഫ് ഉദ്ഘാടനം നിർവഹിച്ചു. ഏരിയ സെക്രട്ടറി കെ.ഡി. സുഗതൻ, ഏരിയ കമ്മിറ്റിയംഗങ്ങളായ പി.എ. നിസാർ, ടി.പി. അജികുമാർ, എം.എൻ. മുരളീധരൻ നായർ, അഡ്വ.പി.എ. നസീർ, സി. സനൽകുമാർ, പ്രൊഫ. ടോമിച്ചൻ ജോസഫ്, ആർ.എസ്. സതീശൻ എന്നിവർ നേതൃത്വം നല്കി.

തൃക്കൊടിത്താനത്ത് പാതയോര സൗന്ദര്യവത്കരണം

ചങ്ങനാശ്ശേരി തൃക്കൊടിത്താനം പഞ്ചായത്തിൽ പാതയോര സൗന്ദര്യവത്കരണം തുടങ്ങി. ആദ്യഘട്ടമായി കുന്നുംപുറം ജങ്ഷനിലാണ് റോഡ് ഡിവൈഡറുകളിലും പ്രധാന ജങ്ഷനുകളിലും ചെടിച്ചട്ടി സ്ഥാപിച്ചത്.

റോഡിനിരുവശവും വൃത്തിയാക്കി. ചെടികളുടെ പരിപാലനച്ചുമതല കുടുംബശ്രീയെയും ഹരിത കർമസേനയെയും ഏൽപ്പിക്കും. കവലയിലെ വ്യാപാരികളും ഓട്ടോറിക്ഷാ തൊഴിലാളികളും ഇതിൽ പങ്കാളികളാകും.

മാടപ്പള്ളി ബ്ലോക്ക് പഞ്ചായത്ത് പ്രസിഡൻ്റ് എൻ. രാജു ഉദ്ഘാടനം നിർവഹിച്ചു. പഞ്ചായത്ത് വൈസ് പ്രസിഡൻ്റ് ബിനോയി ജോസഫ് അധ്യക്ഷത വഹിച്ചു. പഞ്ചായത്ത് പ്രസിഡൻ്റ് മോളി ജോസഫ്, ബ്ലോക്ക് സ്ഥിരം സമിതി അധ്യക്ഷൻ ടി. രഞ്ജിത്ത്, പി.എസ്. സാനില, അരുൺ കുമാർ, അജിത് കുമാർ, ദീപാ എം. കുര്യാക്കോസ്, എൽ. ബീന എന്നിവർ പങ്കെടുത്തു.