വനിതകളിലെ അർബുദനിയന്ത്രണം; 'ആരോഗ്യം ആനന്ദം' പരിപാടി തുടങ്ങി

ചക്കരക്കൽ : വനിതകളിലെ അർബുദനിയന്ത്രണത്തിനുള്ള 'ആരോഗ്യം ആനന്ദം' പരിപാടിക്ക് ജില്ലയിൽ തുടക്കമായി. ലോക അർബുദദിനാചരണത്തിൻ്റെ ഭാഗമായി ഇരിവേരി സാമൂഹികാരോഗ്യകേന്ദ്രത്തിൽ നടത്തിയ ജില്ലാതല പരിപാടി ജില്ലാ പഞ്ചായത്ത് വൈസ് പ്രസിഡൻ്റ് ബിനോയ് കുര്യൻ ഉദ്ഘാടനം ചെയ്‌തു. ആരോഗ്യം ആനന്ദം കാമ്പയിന്റെ ലോഗോ അദ്ദേഹം പ്രകാശനം ചെയ്തു.

ചെമ്പിലോട് ഗ്രാമപ്പഞ്ചായത്ത് പ്രസിഡൻ്റ് കെ. ദാമോദരൻ അധ്യക്ഷനായി. ഡെപ്യൂട്ടി ജില്ലാ മെഡിക്കൽ ഓഫീസർ ഡോ. കെ.ടി. രേഖ മുഖ്യപ്രഭാഷണം നടത്തി. ഇരിവേരി സാമൂഹികാരോഗ്യകേന്ദ്രം മെഡിക്കൽ ഓഫീസർ ഡോ. കെ. മായ ബോധവത്കരണ ക്ലാസെടുത്തു. ചെമ്പിലോട് പഞ്ചായത്ത് അംഗം കെ. സുരേഷ്, ആർ.സി.എച്ച്. ഓഫീസർ ഡോ. ജി. അശ്വിൻ, ഡെപ്യൂട്ടി എജുക്കേഷൻ ആൻഡ് മാസ് മീഡിയ ഓഫീസർ ടി. സുധീഷ്, ഉദ്യോഗസ്ഥർ, ഹരിതകർമസേന-കുടുംബശ്രീ അംഗങ്ങൾ, നഴ്‌സിങ് വിദ്യാർഥികൾ എന്നിവർ പങ്കെടുത്തു.