പ്രാണൻ പകുത്തുനൽകി; അനീഷ് അയർലൻഡിേലക്ക് മടങ്ങുന്നു

തൃശ്ശൂർ: രക്താർബുദബാധിതനായ 13-കാരന് മൂലകോശം നൽകാൻ അയർലൻഡിൽനിന്നെത്തിയ അനീഷ് ദൗത്യം പൂർത്തിയാക്കി മടങ്ങുന്നു. 18-ന് അമൃത ആശുപത്രിയിലായിരുന്നു മൂലകോശദാനം. ഏതെങ്കിലും കാരണവശാൽ കോശദാനം വൈകിയാൽ അതിനുള്ള അവധികൂടിയെടുത്താണ് ഇന്ത്യയിലെത്തിയത്.

2018-ൽ തൃശ്ശൂരിലുള്ള മൂന്നുവയസ്സുകാരന് മൂലകോശം കണ്ടെത്താനുള്ള ക്യാന്പിലാണ് തൃശ്ശൂർ താണിക്കുടത്തെ അനീഷ് ജോർജ് പങ്കാളിയായത്. കോടിക്കണക്കിനുപേർ പങ്കെടുത്ത ക്യാമ്പിൽ ദാതാവിനെ കണ്ടെത്താനാകാതെ മൂന്നു വയസ്സുകാരൻ മരിച്ചു. അനീഷ് അന്നു നൽകിയ കോശം ഇപ്പോൾ രക്താർബുദ ബാധിതനായ 13-കാരന് യോജിക്കുമെന്നറിഞ്ഞാണ് അയർലൻഡിൽനിന്നെത്തിയത്. മൂലകോശദാനത്തിനുള്ള എല്ലാ ചിട്ടകളും ക്രമങ്ങളും കൃത്യമായി പാലിച്ചതോടെ മുൻ നിശ്ചയിച്ചപ്രകാരം 18-ന് മൂലകോശദാനം നടത്താനായി. അധിക അവധി വെട്ടിച്ചുരുക്കി മടക്കയാത്രയും സാധ്യമായി. അയർലൻഡിൽ നഴ്‌സായ കോട്ടയം സ്വദേശി ഭാര്യ മിറ്റുവാണ് ഏറ്റവും പ്രേരണയായത്. മൂലകോശസ്വീകർത്താവിനെ ഒരു വർഷം കഴിഞ്ഞ് കാണാനാകും. അന്ന് അനീഷ് വീണ്ടുമെത്തും.