'ശുദ്ധമായ ഭക്ഷണം ഓരോ പൗരൻെയും ജന്മാവകാശം ' ചായപ്പൊടിയിലെ മായം: ജാഗ്രത പാലിക്കണമെന്ന് മുന്നറിയിപ്പുമായി :ഭക്ഷ്യശ്രീ

ആരോഗ്യ പ്രത്യാഘാതങ്ങൾ

ഇത്തരം മായം ചേർത്ത ചായപ്പൊടി ദീർഘകാലം ഉപയോഗിക്കുന്നത് മനുഷ്യശരീരത്തിന് വലിയ ഭീഷണിയാണ് സൃഷ്ടിക്കുന്നത്. വയറ്റിലെ അൾസർ, ദഹനവ്യവസ്ഥയുടെ തകരാറുകൾ, കരൾ-വൃക്ക രോഗങ്ങൾ എന്നിവയ്ക്കും ദീർഘകാലാടിസ്ഥാനത്തിൽ ക്യാൻസറിനും ഇത് വഴിവെക്കുമെന്ന് ആരോഗ്യവിദഗ്ധർ ചൂണ്ടിക്കാണിക്കുന്നു.

മായം വീടുകളിൽത്തന്നെ തിരിച്ചറിയാം

സാധാരണക്കാർക്ക് ലളിതമായ ചില പരിശോധനകളിലൂടെ ചായപ്പൊടിയുടെ ഗുണനിലവാരം ഉറപ്പാക്കാം:

തണുത്ത വെള്ളത്തിലെ പരിശോധന :

ഒരു ഗ്ലാസ് സാധാരണ തണുത്ത വെള്ളത്തിൽ ഒരു സ്പൂൺ ചായപ്പൊടി ഇടുക. വെള്ളത്തിൽ ഇട്ട ഉടൻ തന്നെ (ചൂടാക്കാതെ) നിറം പടരുകയാണെങ്കിൽ അതിൽ കൃത്രിമ നിറങ്ങൾ ചേർത്തിട്ടുണ്ടെന്ന് ഉറപ്പിക്കാം. ശുദ്ധമായ ചായപ്പൊടി തണുത്ത വെള്ളത്തിൽ പെട്ടെന്ന് നിറം തരില്ല.

ഫിൽട്ടർ പേപ്പർ പരിശോധന

: ഈറനുള്ള വെള്ള കടലാസിലോ ഫിൽട്ടർ പേപ്പറോ കുറച്ചു ചായപ്പൊടി വിതറിയ ശേഷം കഴുകിക്കളയുക. കടലാസിൽ ചുവപ്പോ മഞ്ഞയോ പാടുകൾ തെളിഞ്ഞാൽ കെമിക്കൽ സാന്നിധ്യം ഉറപ്പാണ്.

കാന്തം ഉപയോഗിച്ചുള്ള പരിശോധന:

പ്ലേറ്റിൽ നിരത്തിവെച്ച ചായപ്പൊടിയുടെ മുകളിലൂടെ കാന്തം ചലിപ്പിച്ചാൽ ഇരുമ്പ് പൊടിയുടെ സാന്നിധ്യം തിരിച്ചറിയാം.

ശുദ്ധമായ ഭക്ഷണം പൊതുജനങ്ങളുടെ ജന്മാവകാശമാണെന്നും എഫ്.എസ്.എസ്.എ.ഐ (FSSAI) അംഗീകാരമുള്ള ഉൽപ്പന്നങ്ങൾ മാത്രം വാങ്ങി ഉപയോഗിക്കാൻ ജനങ്ങൾ ശ്രദ്ധിക്കണമെന്നും ഭക്ഷ്യശ്രീ ഭാരവാഹികൾ അഭ്യർത്ഥിച്ചു.