കർക്കടകപ്പെയ്ത്തിലും കരുതലോടെ ശരീരം

ജൈവതാളം വീണ്ടെടുക്കാൻ

ശാസ്ത്രീയ ആയുർവ്വേദം

ഇടതടവില്ലാതെ പെയ്യുന്ന കർക്കടകപ്പെരുമഴക്കാലം വെറുമൊരു വിശ്രമകാലമല്ല, മറിച്ച് ശരീരത്തെയും മനസ്സിനെയും ഒരുപോലെ പുതുക്കിപ്പണിയേണ്ട സവിശേഷമായ ഒരു സന്ധിയാണ്. പലപ്പോഴും കർക്കടക ചികിത്സയെ കേവലമൊരു 'സുഖചികിത്സ'യായി മാത്രം തെറ്റിദ്ധരിക്കാറുണ്ട്. എന്നാൽ, പ്രകൃതിയിലെ മാറ്റങ്ങൾക്കനുസരിച്ച് ശരീരത്തിന്റെ രോഗപ്രതിരോധശേഷി വർദ്ധിപ്പിക്കുന്ന കൃത്യമായ ശാസ്ത്രീയ അടിത്തറയുള്ള ആയുർവ്വേദ പ്രതിരോധമാർഗ്ഗമാണിത്. കനത്ത മഴയും തണുപ്പും അന്തരീക്ഷത്തിൽ രോഗാണുക്കൾ പടരാൻ ഇടയാക്കുമ്പോൾ, അതിനെ നേരിടാൻ ശരീരത്തെ ആഭ്യന്തരമായും ബാഹ്യമായും സജ്ജമാക്കുകയാണ് ഈ കാലയളവിൽ നാം ചെയ്യേണ്ടത്.

ആയുർവ്വേദ ശാസ്ത്രപ്രകാരം രണ്ട് പ്രധാന തത്വങ്ങളിലാണ് കർക്കടകത്തിലെ ശുദ്ധീകരണ പ്രക്രിയകൾ കെട്ടിപ്പടുത്തിരിക്കുന്നത്. അതിൽ ആദ്യത്തേത് ശരീരത്തിന്റെ ബാഹ്യമായ തടവലുകൾ മാത്രമല്ല, മറിച്ച് ശരീരം, മനസ്സ്, വാക്ക്, ചിന്ത, പരിസരം എന്നിവയെല്ലാം ഒന്നിച്ച് സംസ്കരിക്കപ്പെടുന്ന സർവ്വോന്മുഖമായ ശുദ്ധീകരണമാണ്. കനത്ത മഴയും ഇരുണ്ട അന്തരീക്ഷവും മനുഷ്യരിൽ സ്വാഭാവികമായും ഒരുതരം വിഷാദവും മടുപ്പും ഉണ്ടാക്കാറുണ്ട്. ഈ മാനസിക പ്രതിസന്ധിയെ അതിജീവിക്കാനും മനസ്സിന് ശാന്തി നൽകാനുമാണ് പണ്ടുകാലം തൊട്ടേ കർക്കടകത്തിൽ രാമായണ പാരായണം ഉൾപ്പെടെയുള്ള ആത്മീയ ശീലങ്ങൾ നമ്മൾ പിന്തുടർന്നു പോരുന്നത്.

രണ്ടാമത്തെ പ്രധാന തത്വം ശരീരത്തിലെ ജൈവാഗ്നിയെ അഥവാ മെറ്റബോളിസത്തെ സംരക്ഷിക്കുക എന്നതാണ്. ആയുർവ്വേദ വിധിപ്രകാരം ഒരാളുടെ ആരോഗ്യത്തിന്റെ ആകെത്തുക നിലനിൽക്കുന്നത് അയാളുടെ ദഹനശക്തിയിലാണ്. കർക്കടകത്തിലെ അന്തരീക്ഷ വ്യതിയാനങ്ങൾ ഈ അഗ്നിയെ മന്ദീഭവിപ്പിക്കും. ഈ ജൈവാഗ്നിയെ ഉണർത്തി നിർത്തുകയാണ് കർക്കടക ചികിത്സകളുടെ പ്രാഥമിക ലക്ഷ്യം.

പഴയകാലത്ത് കഠിനമായ തണുപ്പും പകര്‍ച്ചവ്യാധികളും നിറഞ്ഞതായിരുന്നു കർക്കടകമാസം. ഇന്നത്തെപ്പോലെ വലിയ ആശുപത്രികളോ ആന്റിബയോട്ടിക്കുകളോ ഇല്ലാതിരുന്ന അക്കാലത്ത്, രോഗങ്ങൾ വരാതിരിക്കാൻ പൂർവ്വികർ സ്വയം കണ്ടെത്തിയ പ്രതിരോധ മാർഗ്ഗങ്ങളായിരുന്നു ഈ വിശ്രമശീലങ്ങൾ. ശരീരത്തിൽ അഗ്നിയെ ഉണർത്താൻ സഹായിക്കുന്ന ഔഷധക്കഞ്ഞികളും നാഡീവ്യൂഹങ്ങളെ ഉണർത്താൻ സഹായിക്കുന്ന എണ്ണതേച്ചുകുളികളും ഇതിന്റെ ഭാഗമായി രൂപപ്പെട്ടതാണ്. തണുത്ത അന്തരീക്ഷത്തിൽ രക്തയോട്ടം സുഗമമാക്കാനും പേശികൾക്ക് ബലം നൽകാനും ഉഴിച്ചിലും പിഴിച്ചിലുമൊക്കെ ശരീരത്തെ സഹായിക്കുന്നു.

ഇന്ന് വിപണിയിൽ കാണുന്ന പരസ്യങ്ങൾ പലതും കർക്കടക ചികിത്സയെ ഒരു 'റെഡിമെയ്ഡ് പാക്കേജ്' ആയാണ് അവതരിപ്പിക്കാറുള്ളത്. എന്നാൽ യഥാർത്ഥത്തിൽ ആയുർവ്വേദം ഒരോ വ്യക്തിയുടെയും ശരീരപ്രകൃതിക്ക് അനുസരിച്ച് ചെയ്യേണ്ട ഒന്നാണ്. വാത, പിത്ത, കഫ അവസ്ഥകളും അവർക്കുള്ള മുൻകാല രോഗങ്ങളും (പ്രമേഹം, കൊളസ്ട്രോൾ, തൈറോയ്ഡ് തുടങ്ങിയവ) കൃത്യമായി പരിശോധിച്ചതിനു ശേഷം മാത്രമേ അഭ്യംഗം, കിഴി, പിഴിച്ചിൽ, വസ്തി തുടങ്ങിയ ചികിത്സകൾ നിശ്ചയിക്കാവൂ. വിദഗ്ദ്ധരായ ആയുർവ്വേദ ഡോക്ടർമാരുടെ നിർദ്ദേശമില്ലാതെ ഇത്തരം ചികിത്സകളിലേക്ക് കടക്കുന്നത് ഗുണത്തേക്കാളേറെ ദോഷം ചെയ്യും.

ആരോഗ്യം എന്നത് അങ്ങാടിയിൽ നിന്നും പണം നൽകി വാങ്ങാൻ കഴിയുന്ന ഒന്നല്ല, അത് നമ്മുടെ ശരീരത്തിന് വേണ്ടി നമ്മൾ തന്നെ കരുതലോടെ ഉണ്ടാക്കിയെടുക്കേണ്ട ഒന്നാണ്. ഈ കർക്കടകകാലത്ത് നിങ്ങളുടെ ശരീരത്തിന് ശരിയായ കാവലൊരുക്കാൻ വടകര സമുദ്ര ആയുർവ്വേദ ഗവേഷണ കേന്ദ്രത്തിൽ തികച്ചും ശാസ്ത്രീയവും വ്യക്തിഗതവുമായ ചികിത്സാ സൗകര്യങ്ങളാണ് ഒരുക്കിയിട്ടുള്ളത്. പരമ്പരാഗത ആയുർവ്വേദ വിധിപ്രകാരമുള്ള കൃത്യമായ പരിചരണത്തിലൂടെ രോഗങ്ങളെ പടിക്കുപുറത്താക്കാനും, ആരോഗ്യപൂർണ്ണമായ ഒരു പുതിയ ജീവിതശൈലിയിലേക്ക് ചുവടുവെക്കാനും നമുക്ക് ജാഗ്രതയോടെ ഒരുമിച്ച് മുന്നേറാം

-ഡോ .അശ്വതി രാജ് BAMS 

അസി .ഡയറക്റ്റർ , (സമുദ്ര ആയുർവ്വേദ ഗവേഷണകേന്ദ്രം ,വടകര )