എരമംഗലം കുടുംബാരോഗ്യകേന്ദ്രത്തിന് ആന്റിബയോട്ടിക് സ്‌മാർട്ട് ഹോസ്‌പിറ്റൽ പദവി

ബാലുശ്ശേരി ഗ്രാമപ്പഞ്ചായത്തിന് കീഴിലുള്ള എരമംഗലം കുടുംബാരോഗ്യകേന്ദ്രം സംസ്ഥാന സർക്കാരിന്റെ ആന്റിബയോട്ടിക് സ്‌മാർട്ട് ഹോസ്‌പിറ്റൽ പദവി സ്വന്തമാക്കി. സംസ്ഥാനത്തുടനീളം ആന്റിമൈക്രോബിയൽ പ്രതിരോധ പ്രവർത്തനങ്ങൾ (AMR) ശക്തമാക്കുന്നതിന്റെ ഭാഗമായാണ് ആരോഗ്യവകുപ്പ് ഈ പുരസ്‌കാരം പ്രഖ്യാപിച്ചത്. നിശ്ചിത മാനദണ്ഡങ്ങൾ കൃത്യമായി പാലിച്ചുവെന്ന് വിദഗ്‌ധ പരിശോധനയിൽ തെളിഞ്ഞതിനെത്തുടർന്നാണ് കേന്ദ്രത്തിന് ഈ പദവി ലഭിച്ചത്. അടുത്ത രണ്ട് വർഷത്തേക്കാണ് ഈ അംഗീകാരം നിലനിൽക്കുക.

​ആഗോളതലത്തിൽ വലിയൊരു ആരോഗ്യപ്രശ്നമായി വളരുന്ന ബാക്ടീരിയകളുടെ മരുന്നുപ്രതിരോധ ശേഷിക്കെതിരെ (ആന്റി മൈക്രോബിയൽ റെസിസ്റ്റൻസ്) ബാലുശ്ശേരി ഗ്രാമപ്പഞ്ചായത്തിൽ മികച്ച പ്രവർത്തനങ്ങളാണ് നടന്നുവരുന്നത്. കുടുംബശ്രീ, ഐ.സി.ഡി.എസ്, മെഡിക്കൽ ഷോപ്പുകൾ, വിദ്യാർഥികൾ, പൊതുജനങ്ങൾ എന്നിവരെ ഉൾപ്പെടുത്തിക്കൊണ്ട് വിപുലമായ ബോധവത്കരണ പരിപാടികൾ നടപ്പിലാക്കി വരികയാണെന്ന് മെഡിക്കൽ ഓഫീസർ ഡോ. കെ.എസ്. നിത്യ അറിയിച്ചു. അശാസ്ത്രീയമായ ആന്റിബയോട്ടിക് ഉപയോഗം കുറയ്ക്കാനും പ്രതിരോധ പ്രവർത്തനങ്ങൾ ജനകീയമാക്കാനും ഈ പദവി സഹായകമാകും.