അടുക്കള രഹസ്യം അങ്ങാടിപ്പാട്ടാകണം: ദിവാകരൻ ചോമ്പാല

 ഹോട്ടൽ ഭക്ഷണത്തിലെ സുതാര്യത പൗരന്റെ അവകാശം!

"അടുക്കള രഹസ്യം അങ്ങാടിപ്പാട്ട്" എന്നൊരു പഴയ ചൊല്ലുണ്ട്. എന്നാൽ ഇന്നത്തെ കാലത്ത് ഹോട്ടലുകളുടെ കാര്യത്തിൽ ഈ ചൊല്ല് അന്വർത്ഥമാകേണ്ടത് പൊതുജനാരോഗ്യത്തിന് അത്യന്താപേക്ഷിതമാണ്. നാലു ചുവരുകൾക്കുള്ളിൽ ഒളിപ്പിച്ചുവെച്ചിരിക്കുന്ന ഹോട്ടൽ അടുക്കളകളിലെ 'രഹസ്യങ്ങൾ' ഡൈനിംഗ് ഹാളിലെ മോണിറ്ററുകളിലൂടെ 'അങ്ങാടിപ്പാട്ടായി' മാറണം. എങ്കിൽ മാത്രമേ കഴിക്കുന്ന ഭക്ഷണത്തിന്റെ ശുദ്ധിയിൽ ഉപഭോക്താവിന് ഉറപ്പു ലഭിക്കൂ.

എന്തുകൊണ്ട് ഈ 'രഹസ്യം' വെളിപ്പെടണം?

അടച്ചിട്ട വാതിലുകൾക്ക് പിന്നിലെ അപകടം: എസി മുറികളിലെ ഗ്ലാസ് പാത്രങ്ങളിൽ വിളമ്പുന്ന ഭക്ഷണത്തിന്റെ പകിട്ടിൽ നമ്മൾ പലപ്പോഴും അടുക്കളയിലെ അഴുക്ക് കാണുന്നില്ല. പച്ചക്കറികൾ കഴുകുന്നതിലോ, മാംസം വൃത്തിയാക്കുന്നതിലോ പുലർത്തുന്ന വീഴ്ചകൾ ഉപഭോക്താവ് അറിയുന്നില്ല.

ഫ്രീസറിൽ ഉറങ്ങുന്ന പഴയ ഭക്ഷണങ്ങൾ വീണ്ടും ചൂടാക്കി പുതിയ രൂപത്തിൽ എത്തുമ്പോൾ, അത് തിരിച്ചറിയാൻ അടുക്കളയിലെ ദൃശ്യങ്ങൾ പൗരന് മുന്നിലെത്തണം.

അടുക്കളയിൽ സി.സി.ടി.വി സ്ഥാപിച്ച് അതിന്റെ തത്സമയ ദൃശ്യങ്ങൾ ഡൈനിംഗ് ഹാളിൽ പ്രദർശിപ്പിക്കുന്നത് വഴി ഈ "അടുക്കള രഹസ്യങ്ങൾ" ഇല്ലാതാക്കാം. ഡിജിറ്റൽ സുതാര്യത ഹോട്ടലുകളുടെ വിശ്വാസ്യത വർദ്ധിപ്പിക്കും.