ഓണപ്പലഹാരങ്ങളുടെ കണ്ണഞ്ചിപ്പിക്കുന്ന നിറം മരണത്തിലേക്കുള്ള തീർത്ഥയാത്ര: ഡോ .കെ .കെ .എൻ.കുറുപ്പ് 'ഭക്ഷ്യശ്രീ' സംസ്ഥാന ചെയർമാൻ.

ഓണപ്പലഹാരങ്ങളുടെ കണ്ണഞ്ചിപ്പിക്കുന്ന നിറം മരണത്തിലേക്കുള്ള തീർത്ഥയാത്ര: ഡോ .കെ .കെ .എൻ.കുറുപ്പ് 

('ഭക്ഷ്യശ്രീ' സംസ്ഥാന ചെയർമാൻ.)

ഓണപ്പലഹാരങ്ങളുടെ കണ്ണഞ്ചിപ്പിക്കുന്ന നിറങ്ങൾ ആരോഗ്യത്തിന്റെ ചിഹ്നമല്ല, മരണത്തിലേക്കുള്ള തീർത്ഥയാത്രയാണ്. കേരളീയരുടെ ഭക്ഷണപ്പാത്രത്തിൽ ഇന്ന് നിറയുന്നത് ശുദ്ധഭക്ഷണമല്ല, മറിച്ച് വിഷം കലർന്ന വിഭവങ്ങളാണ്.

ഭക്ഷണം ജീവന്റെ അടിത്തറയാണെന്ന് പറയുമ്പോൾ, അത് മനുഷ്യന്റെ അടിസ്ഥാനാവകാശവുമാണ് എന്ന സത്യം ഭരണകൂടവും സമൂഹവും ഒരുപോലെ മറന്നുപോകുന്നു.

മീൻ കേടാകാതിരിക്കാനായി ചേർക്കുന്ന അമിത രാസവസ്തുക്കളിൽ നിന്ന് തുടങ്ങിക്കൊണ്ട്, വെളിച്ചെണ്ണ, ശർക്കര, പഴങ്ങൾ, പച്ചക്കറികൾ, പാലു വരെ എല്ലായിടത്തും വിഷമാണ് കലർന്നിരിക്കുന്നത്.

തക്കാളി മുതൽ ആപ്പിൾ വരെ രാസജലത്തിൽ മുക്കി വിൽപ്പനയ്‌ക്കെ ത്തുമ്പോൾ, കൈപ്പക്കയിൽ കുത്തിവയ്ക്കുന്ന രാസവസ്തുക്കൾക്കൊപ്പം, “ഭക്ഷ്യധ്രോഹം” നമ്മുടെ ദൈനംദിനജീവിതത്തിന്റെ ഭാഗമാകുകയാണ്. ആരോഗ്യത്തിന് പോഷണം നൽകേണ്ട ഭക്ഷണം തന്നെയാണ് രോഗത്തിന്റെ വിത്തായി മാറിക്കൊണ്ടിരിക്കുന്നത്.

കാൻസറിന്റെ വർദ്ധനവ്, മാറാരോഗങ്ങൾ, ഹോർമോൺ അസന്തുലിതാവസ്ഥ, വന്ധ്യത—എല്ലാം ഭക്ഷണത്തിലെ വിഷാംശത്തോടാണ് ബന്ധിപ്പിക്കപ്പെടുന്നത്. എൻഡോസൾഫാനെപ്പോലെ തലമുറകളെ തന്നെ വികൃതമാക്കുന്ന സാഹചര്യത്തിലാണ് നാം ഇന്ന് ജീവിക്കുന്നത്. ഗർഭസ്ഥ ശിശുവിനെപ്പോലും ഇത് ബാധിക്കുന്നു.

ഭരണകൂടത്തിന്റെ ഉത്തരവാദിത്വം

ഭക്ഷ്യസുരക്ഷ ഉറപ്പാക്കുക ഭരണഘടനാപരമായ കടമയാണ്. എന്നാൽ സർക്കാരിന്റെ ഇടപെടലുകൾ പലപ്പോഴും “തലോടൽ” മാത്രമാകുന്നു. ഇടയ്ക്കിടെ നടത്തുന്ന പരിശോധനകളും ചുമത്തുന്ന ചെറിയ പിഴകളും, പിന്നിൽ പ്രവർത്തിക്കുന്ന ശക്തമായ അനധികൃതവ്യാപാരത്തിന് ഒരു തടസ്സവുമാകുന്നില്ല. മൂന്നു ദിവസം അടപ്പിച്ച് നാലാം ദിവസം തുറക്കുന്ന രീതിയാണ് കണ്ടുവരുന്നത്. ജനങ്ങളുടെ ആരോഗ്യമെന്ന അടിസ്ഥാനാവകാശത്തെ ഭരണകൂടം തന്നെ വഞ്ചിക്കുന്ന സ്ഥിതിയാണിത്.

ഓണ വിപണിയിൽ മായം കലർന്ന വെളിച്ചെണ്ണ വിലകുറച്ച് ലഭിക്കുന്നുവെന്ന വാർത്ത ഞെട്ടിക്കുന്നതാണ്. വിലക്കുറവിനുള്ളിൽ പതിയിരിക്കുന്ന കൊലച്ചതി തിരിച്ചറിയാതെ വാങ്ങുന്ന പാവങ്ങൾ അറിയാതെ കെണിയിലകപ്പെടുന്നുവെന്നതാണ് ഭയാനകം.

അതേസമയം, ശുദ്ധഭക്ഷണം നൽകാൻ പരിശ്രമിക്കുന്ന ചില വ്യക്തികളും സ്ഥാപനങ്ങളും ഉണ്ട്—മറയൂർ സഹകരണ ബാങ്കിന്റെ ശർക്കര മുതൽ, പള്ളൂരിലെ അഗ്മാർക്ക് അംഗീകാരം നേടിയ വെളിച്ചെണ്ണ . ഇത്തരം മാതൃകകളെ സമൂഹം തിരിച്ചറിയുകയും ഉയർത്തിക്കാണിക്കുകയും വേണം.

 ശുദ്ധമായ വെളിച്ചെണ്ണനിർമ്മിച്ച് കേന്ദ്ര സർക്കാർ അംഗീകാരംവരെ നേടിയ പള്ളൂരിലെ മന്നൻ അഗ്മാർക്ക് വെളിച്ചെണ്ണ നിർമ്മാതാവ് വിപിൻകുമാർ, അജ്‌മി പുട്ടുപൊടിയുടെ നിർമ്മാതാവ് ഈരാറ്റുപേട്ടയിലെ ഫൈസൽ, 'സേനാ നായാക് 'എന്ന ബ്രാൻഡിൽ യു പി യിൽനിന്നും ഗോതമ്പ് മാവ് നിർമ്മിക്കുന്ന മലയാളി മുരളീധരൻ , വടകര കേന്ദ്രമായി പ്രവർത്തിക്കുന്ന മഹാത്മാ ദേശസേവ ട്രസ്റ്റിൻ്റെ ജൈവകലവറ , ശുദ്ധമായ തേങ്ങാപ്പാലും മസാലപ്പൊടികളും വെളിച്ചെണ്ണയും തവിട് കളയാത്ത അരിയും മറ്റു ധാന്യപ്പൊടികളും വിതരണം ചെയ്യുന്ന മുക്കാളിയിലെ രാജൻസ് അരവുകേന്ദ്രം ഉടമ വട്ടക്കണ്ടി രാജൻ ,  ഇഡ്‌ഡലി -ദോശമാവ് നിർമ്മിക്കുന്ന 'തരണി ഇല്ലം നമ്പുതിരി നിർമ്മാതാക്കൾ , ഭാഗ്യലക്ഷമി എന്ന ഗ്രാമീണ സ്ത്രീയുടെ കല്ലാമലയിലെ മല്ലിവറുത്തുപൊടിച്ചെടുത്ത് വിൽക്കുന്ന പി കെ പ്രോഡക്ട് ,കോവ്ക്കൽ കടവിലെ ഗീതയുടെ ഭക്ഷ്യശ്രീ ബട്ടർമിൽക്ക് ,അച്ചാറുകൾ തുടങ്ങി അക്കമിട്ട് നിരത്താൻ ജനപ്രിയരായി മാറിയ നിർമ്മാതാക്കൾ ചെറുതും വലുതുമായി ഏറെയുണ്ട് .

ഓർമ്മയിൽ നിന്നും എടുത്തുപറയാൻ തോന്നുന്നതാവട്ടെ നിർമ്മാണത്തിൽ അവർ കാണിക്കുന്ന സൂക്ഷ്‌മതയും കൃത്യബോധവും ഉപയോക്താക്കൾ നൽകുന്ന അംഗീകാരവും കൊണ്ടുമാത്രം .

'സമൂഹത്തിൻ്റെയും ജനങ്ങളുടെയും കടമ

സർക്കാരിൻ്റെ ഇടപെടലുകൾ പര്യാപ്തമല്ലെങ്കിൽ, സമൂഹം തന്നെ ഇടപെടേണ്ടതാണ്. വീട്ടുവളപ്പിൽ വിഷരഹിത കൃഷിക്ക് പ്രാധാന്യം നൽകുകയും, മായം കലർത്തുന്ന വ്യാപാരികളെ തിരിച്ചറിയുകയും, ബഹിഷ്കരിക്കുകയും വേണം. “ഭക്ഷ്യശ്രീ” പോലുള്ള സംഘടനകൾ രംഗത്തിറങ്ങുന്നത് ആശ്വാസകരമാണ്. എന്നാൽ സർക്കാർ, സമൂഹം, ജനങ്ങൾ—മൂന്നും ഒരുമിച്ച് പ്രവർത്തിച്ചാൽ മാത്രമേ ഭാവി തലമുറയ്ക്ക് ശുദ്ധഭക്ഷണവും ആരോഗ്യവും ലഭ്യമാവുകയുള്ളൂ.

വെറും മുന്നറിയിപ്പുകളും ചെറിയ പിഴകളും മതിയാകില്ല. പൊതുജനാരോഗ്യവുമായി കളിക്കുന്നവർ സമൂഹത്തിന്റെ ശത്രുക്കളാണ്. ഇവർക്കെതിരെ മാതൃകാപരമായ കടുത്ത ശിക്ഷ നടപ്പാക്കാതെ പ്രശ്നം തീരുകയില്ല. കേസുകളുടെ വിചാരണ വേഗത്തിൽ പൂർത്തിയാക്കുകയും തടവുശിക്ഷ ഉറപ്പാക്കുകയും വേണം.

ഒരു സമാപനം

ശുദ്ധമായ ഭക്ഷണം ഒരു ആഡംബരമല്ല—ജന്മാവകാശമാണ്. ആ അവകാശം സംരക്ഷിക്കപ്പെടാത്തിടത്ത് പൊതുജനാരോഗ്യവും തലമുറകളുടെ സുരക്ഷയും അപകടത്തിലാവും. അതിനാൽ സർക്കാരും, സംഘടനകളും, സമൂഹവും ചേർന്ന് “സന്ധിയില്ലാത്ത സമരം” ആരംഭിക്കേണ്ടത് അനിവാര്യമാണ്.

തിന്മക്കെതിരെ മുഖം തിരിക്കുക, നന്മയെ നെഞ്ചിലേറ്റുക—ശുദ്ധമായ ഭക്ഷണത്തിനായി നമുക്ക് കൈകോർക്കാം .