കായകൽപ് പുരസ്‌കാരത്തിൽ വീണ്ടും നേട്ടവുമായി കരുനാഗപ്പള്ളി താലൂക്ക് ആശുപത്രി

കരുനാഗപ്പള്ളി : മികച്ച ആരോഗ്യകേന്ദ്രങ്ങൾക്ക് നൽകുന്ന കായകൽപ് അവാർഡ് വീണ്ടും നേടി കരുനാഗപ്പള്ളി താലൂക്ക് ആശുപത്രി. താലൂക്ക് ആശുപത്രികൾക്ക് നൽകുന്ന കമൻഡേഷനിൽ 79 ശതമാനം മാർക്കാണ് താലൂക്ക് ആശുപത്രി കരസ്ഥമാക്കിയത്. ഒരുലക്ഷം രൂപയാണ് അവാർഡ് തുക. പോയിൻ്റ്നിലയിൽ സംസ്ഥാനത്ത് ആറാം സ്ഥാനമാണിത്. ഇത് അഞ്ചാം തവണയാണ് താലൂക്കാശുപത്രി അവാർഡിന് അർഹമാകുന്നത്.

സംസ്ഥാനത്തുതന്നെ ഒപിയിൽ ഏറ്റവും കൂടുതൽ രോഗികൾ എത്തുന്ന താലൂക്ക് ആശുപത്രികളിലൊന്നാണ് കരുനാഗപ്പള്ളി. കായകൽപ് അവാർഡിൽ മൂന്നുതവണ ജില്ലയിൽ ഒന്നാംസ്ഥാനവും ഒരുതവണ സംസ്ഥാനത്ത് മൂന്നാംസ്ഥാനവും നേടാൻ ആശുപത്രിക്ക് കഴിഞ്ഞിരുന്നു.

ഒൻപതു നില കെട്ടിടത്തിൻ്റെ ഉൾപ്പെടെ നിർമാണപ്രവർത്തനങ്ങൾ നടന്നുവരികയാണ്. ഈ സാഹചര്യത്തിൽ ഒട്ടേറെ പരിമിതികൾക്കുള്ളിൽനിന്നാണ് മികച്ച പോയിൻ്റനിലയിലേക്ക് എത്താൻ സാധിച്ചതെന്ന് ആശുപത്രി സൂപ്രണ്ട് ഡോ. സോമസ് അൽഫോൻസ് പറഞ്ഞു.