കൃഷിയും ഒരു തെറാപ്പി...

തൊടുപുഴ: ഓണത്തോടനുബന്ധിച്ച് കുടുംബശ്രീ നടപ്പാക്കുന്ന നിറപ്പൊലിമ പരിപാടിയുടെ ഭാഗമായി ഞാനുംപൂവും എന്ന പദ്ധതിക്ക് വാത്തിക്കുടി നവജ്യോതി ബഡ്‌സ് സ്‌കൂളിൽ തുടക്കം. കുട്ടികളിൽ മാനസിക ഉല്ലാസത്തിന് ഹോർട്ടികൾച്ചർ തെറാപ്പി ലക്ഷ്യമിട്ട് നടത്തുന്ന പദ്ധതി നവജ്യോതി ബഡ്‌സ് സ്‌കൂളും കുടുംബശ്രീ ജില്ലാമിഷൻ ഇടുക്കിയും സംയുക്തമായാണ് സംഘടിപ്പിക്കുന്നത്. വാത്തിക്കുടി പഞ്ചായത്ത് പ്രസിഡൻ്റ് ജോസ്‌മി ജോർജ് ഉദ്ഘാടനം ചെയ്തു.

പദ്ധതി ഇങ്ങനെ

ജെഎർജി അംഗങ്ങളുടെ നേതൃത്വത്തിൽ നവജ്യോതി ബഡ്‌സ് സ്‌കൂളിലെ അഞ്ചുസെന്റ് പുരയിടത്തിൽ നാലുതരം പൂക്കൾ കൃഷിചെയ്യും. പൂക്കൾ നടുന്നതിലും പരിപാലിക്കുന്നതിലും വിളവെടുക്കുന്നതിലും കുട്ടികൾ സജീവമായി പങ്കാളികളാകും.

ഇത് അവർക്ക് മാനസിക ഉല്ലാസം നൽകുന്നതിനൊപ്പം തെറാപ്പിയായും പ്രവർത്തിക്കും. പൂക്കൾ വളരുന്നതും പൂവിടുന്നതും വിളവെടുക്കുന്നതും നേരിട്ടറിയാൻ ഇതിലൂടെ അവസരമുണ്ടാകും. ഓഗസ്റ്റ് അവസാനത്തോടെ വിളവെടുക്കും.