കോട്ടപ്പള്ളിയിൽ കറുത്ത മാറിടൻ നെയ്ത്തുപക്ഷിയെ കണ്ടെത്തി; കേരളത്തിൽ രണ്ടാം തവണ

വടകര: കോട്ടപ്പള്ളിയിൽ കറുത്ത മാറിടൻ നെയ്ത്തുപക്ഷിയെ കണ്ടെത്തി. കേരളത്തിൽ ആദ്യമായി വർഷങ്ങൾക്ക് മുമ്പ് കണ്ണൂരിലാണ് ഈ നെയ്ത്തുപക്ഷിയെ കണ്ടിട്ടുള്ളത്. പിന്നീട് കോഴിക്കോട് കോട്ടപ്പള്ളിയുടെ ഭാഗത്താണ് ഇപ്പോൾ ഇവയെ കണ്ടെത്തുന്നത്. വടകര മാഹി കനാലിന്റെ കോട്ടപ്പള്ളി ഭാഗത്താണ് പ്രകൃതിയുടെ നെയ്ത്തുകാരനായ ഈ പക്ഷി വിരുന്നെത്തിയത്.

​പക്ഷി നിരീക്ഷകനും റിട്ട. അധ്യാപകനുമായ കീഴൽ താഴത്ത് മഠം മോഹനകൃഷ്ണനാണ് തിങ്കളാഴ്ച രാവിലെ പത്തോടെ തൂക്കണാംകുരുവി കൂട്ടത്തിനൊപ്പം രണ്ട് കറുത്ത മാറിടൻ നെയ്ത്തുപക്ഷികളെയും കണ്ടെത്തിയത്. പ്ലോസിയസ് ബെൻഗാലെൻസിസ് എന്നാണ് ഇതിന്റെ ശാസ്ത്രീയ നാമം. നെയ്ത്തുപക്ഷി കുടുംബത്തിൽപ്പെട്ട ഈ പക്ഷി പ്രജനന കാലത്ത് ആൺപക്ഷിയുടെ തലയിൽ പ്രകടമാകുന്ന മഞ്ഞകലർന്ന ഓറഞ്ച് നിറവും മാറിടത്തിലെ കറുത്ത അടയാളവുംകൊണ്ട് ഏറെ ആകർഷകമാണ്.

​പുൽമേടുകൾ, കൃഷിയിടങ്ങൾ, നെൽപ്പാടങ്ങൾ തുടങ്ങിയ തുറസായ പ്രദേശങ്ങളിലാണ് ഇവയെ സാധാരണയായി കാണുന്നത്. വിത്തുകളും ചെറുപ്രാണികളുമാണ് ഇവയുടെ പ്രധാന ഭക്ഷണം. സസ്യനാരുകളും പുല്ലുകളും ഉപയോഗിച്ച് അതിമനോഹരമായ കൂടുകൾ നിർമിക്കുന്നതാണ് ഇവയുടെ പ്രധാന സവിശേഷത. ഈ പ്രദേശത്ത് ഇതിനുമുമ്പ് അപൂർവങ്ങളായ വെള്ളവാലുകുലുക്കി പക്ഷികളെയും കണ്ടെത്തിയിരുന്നു.