ചുനക്കരയിലെ നെൽക്കൃഷി; മികച്ചവിളവുമായി വിമുക്തഭടന്മാർ

ചാരുംമൂട് തരിശുകിടന്നിരുന്ന പാടശേഖരത്തിലടക്കം നെൽക്കൃഷിചെയ്ത് നൂറുമേനി വിളയിച്ച് വിമുക്തഭടന്മാരായ കർഷകർ. കഴിഞ്ഞദിവസമായിരുന്നു വിളവെടുപ്പ്. ചുനക്കര നടുവിൽ കിഴക്ക് കുഴിയത്ത് മാതൃഭൂമി ഏജന്റുകൂടിയായ മുരളീധരൻപിള്ള, ചുനക്കര നടുവിൽ കിഴക്ക് മീനത്തേതിൽ ആനന്ദൻപിള്ള എന്നിവരാണ് പെരുവേലിച്ചാൽപുഞ്ചയിലെ കളിയ്ക്കൽ പാടശേഖരത്തിലെ ഒൻപത് ഏക്കർ സ്ഥലത്ത് കൃഷിചെയ്‌ത്‌ മികച്ചവിജയം നേടിയത്.

മുരളീധരൻപിള്ള കരസേനയിൽനിന്നും ആനന്ദൻപിള്ള സിആർപിഎഫിൽനിന്നും വിരമിച്ചെത്തിയശേഷമാണ് 2017-ൽ കൃഷിയിലേക്കു തിരിഞ്ഞത്. പാട്ടത്തിനെടുത്ത കുറച്ചു സ്ഥലത്തുമാത്രമായിരുന്നു കഴിഞ്ഞവർഷം കൃഷി ചെയ്‌തിരുന്നത്. ഈ വർഷം കൃഷി കൂടുതൽ സ്ഥലത്തേക്കു വ്യാപിപ്പിക്കുകയായിരുന്നു.

ചുനക്കര കൃഷിഭവനിൽനിന്നു നൽകിയ ഉമ നെൽവിത്താണ് വിതച്ചത്. 123 ദിവസം കഴിഞ്ഞപ്പോൾ കൊയ്ത്തു നടന്നു. 28.20 രൂപയാണ് ഒരുകിലോ നെല്ലിനു മില്ലുകാർ നൽകുന്നത്. കയറ്റിറക്കുകൂലിയും മറ്റും സർക്കാർ നിശ്ചയിച്ചതിലും കൂടുതൽ കൊടുക്കേണ്ടിവരുന്നതായി അവർ പരാതിപ്പെട്ടു.