കുറിച്ചി അദ്വൈതവിദ്യാശ്രമം ഹയർ സെക്കൻഡറി സ്‌കൂൾ നവതി ഉത്സവം 26-ന്

കുറിച്ചി: കുറിച്ചി അദ്വൈത വിദ്യാശ്രമം ഹയർ സെക്കൻഡറി സ്‌കൂൾ നവതി ആഘോഷം 26-ന് സ്‌കൂൾ ഓഡിറ്റോറിയത്തിൽ നടക്കും. രാവിലെ 10-ന് നടക്കുന്ന നവതി സമ്മേളനം മന്ത്രി വി.എൻ.വാസവൻ ഉദ്ഘാടനം ചെയ്യും. ശിവഗിരി മഠം പ്രസിഡന്റ് സ്വാമി സച്ചിദാനന്ദ അധ്യക്ഷനാകും.

നവതിസ്മരണിക മന്ത്രി വി.എൻ. വാസവൻ പ്രകാശനം ചെയ്യും. സ്‌കൂൾ മാനേജർ സ്വാമി വിശാലാനന്ദ ആദ്യപ്രതി ഏറ്റുവാങ്ങും. തിരുവഞ്ചൂർ രാധാകൃഷ്ണൻ എം.എൽ.എ. മുഖ്യാതിഥി ആയിരിക്കും. ശിവഗിരിമഠം ജനറൽ സെക്രട്ടറി സ്വാമി ശുഭാംഗാനന്ദ അനുഗ്രഹപ്രഭാഷണം നടത്തും.

രണ്ടിന് പൂർവ അധ്യാപക-വിദ്യാർഥി സംഗമം ജോബ് മൈക്കിൾ എം.എൽ.എ. ഉദ്ഘാടനം ചെയ്യും. സി.കെ. കുര്യാക്കോസ് അധ്യക്ഷത വഹിക്കും. പൂർവ അധ്യാപകരെ ശിവഗിരി മഠം ട്രഷറർ സ്വാമി ശാരദാനന്ദ ആദരിക്കും. പ്രഗല്‌ഭരായ പൂർവ വിദ്യാർഥികളെ സ്വാമി വിശാലാനന്ദ അനുമോദിക്കും.

വിദ്യാർഥികൾക്ക് കാഷ് അവാർഡ് വിതരണം പി.കെ. ശ്രീനിവാസൻ നിർവഹിക്കും. റിട്ട. സ്റ്റാഫ് ആൻഡ് ഓൾഡ് സ്റ്റുഡന്റ്‌സ് അസോസിയേഷൻ സെക്രട്ടറി ടി.എസ്. സലിം റിപ്പോർട്ട് അവതരിപ്പിക്കും. തുടർന്ന് പൂർവവിദ്യാർഥികൾ കലാപരിപാടികൾ അവതരിപ്പിക്കും. സ്‌കൂൾ പൂർവ അധ്യാപക-വിദ്യാർഥി സംഘടനയാണ് നവതി ഉത്സവം നടത്തുന്നത്.