കെ.ടി.യു. അഞ്ചാം സെമസ്റ്റർ ഇയർ ബാക്ക് സിസ്റ്റം താൽക്കാലികമായി ഒഴിവാക്കി

തിരുവനന്തപുരം: എ.പി.ജെ. അബ്ദുൾ കലാം സാങ്കേതിക സർവകലാശാലയിലെ (KTU) എസ് 5 (2024 അഡ്മിഷൻ) വിദ്യാർഥികൾക്കുള്ള ഇയർ ബാക്ക് സിസ്റ്റം താൽക്കാലികമായി ഒഴിവാക്കാൻ സിൻഡിക്കേറ്റ് യോഗം തീരുമാനിച്ചു. വിദ്യാർഥി സംഘടനകളുടെ ആവശ്യപ്രകാരം ഉന്നതവിദ്യാഭ്യാസ മന്ത്രി ഇടപെട്ടതിനെത്തുടർന്നാണ് നടപടി. ഇതിലൂടെ 2024-ലെ ബോർഡ് ഓഫ് ഗവേണൻസ് തീരുമാനം റദ്ദാക്കുകയായിരുന്നു.

​ഒന്നും രണ്ടും സെമസ്റ്റർ പരീക്ഷകളിൽ നിന്ന് 18 ക്രെഡിറ്റ് നേടാത്തവർക്ക് അഞ്ചാം സെമസ്റ്ററിലേക്ക് പ്രവേശനം നിഷേധിക്കുന്ന രീതിയാണ് ഇതോടെ ഇല്ലാതായത്. വിദ്യാർഥി പ്രതിഷേധങ്ങളെത്തുടർന്നാണ് തീരുമാനം. ഇയർ ബാക്ക് സിസ്റ്റം പൂർണ്ണമായും പിൻവലിക്കും വരെ പ്രക്ഷോഭങ്ങളുമായി മുന്നോട്ടുപോകുമെന്ന് വിദ്യാർഥി സംഘടനകൾ വ്യക്തമാക്കി.