സി.ബി.എസ്.ഇ പത്താം ക്ലാസ് രണ്ടാം ബോര്‍ഡ് പരീക്ഷാഫലം പ്രസിദ്ധീകരിച്ചു; ഫലം ഔദ്യോഗിക വെബ്സൈറ്റില്‍ ലഭ്യമാണ്

ന്യൂഡല്‍ഹി: സെൻട്രല്‍ ബോർഡ് ഓഫ് സെക്കൻഡറി എജ്യുക്കേഷൻ (സി.ബി.എസ്.ഇ) പത്താം ക്ലാസ് രണ്ടാം ബോർഡ് പരീക്ഷയുടെ അന്തിമ ഫലം ഔദ്യോഗികമായി പ്രസിദ്ധീകരിച്ചു. ഈ പരീക്ഷ എഴുതിയ വിദ്യാർഥികള്‍ക്ക് ഇനി സി.ബി.എസ്.ഇയുടെ ഔദ്യോഗിക വെബ്സൈറ്റായ cbse.gov.in വഴിയോ അല്ലെങ്കിൽ results.digilocker.gov.in എന്ന ഡിജിലോക്കർ പോർട്ടലിലൂടെയോ തങ്ങളുടെ പരീക്ഷാഫലം പരിശോധിക്കാവുന്നതാണ്. വിദ്യാർഥികള്‍ക്ക് തങ്ങളുടെ റോള്‍ നമ്പർ, സ്കൂള്‍ നമ്പർ, അഡ്മിറ്റ് കാർഡ് ഐഡി തുടങ്ങിയ വിവരങ്ങള്‍ വെബ്സൈറ്റിൽ നൽകി ഫലം ലഭ്യമാക്കാം.

​വിദ്യാർത്ഥികൾക്ക് അവരുടെ ഡിജിറ്റൽ മാർക്ക് ലിസ്റ്റും മറ്റ് അനുബന്ധ പരീക്ഷാ വിവരങ്ങളും ഡിജിലോക്കർ ആപ്പ് വഴിയും ഡൗണ്‍ലോഡ് ചെയ്ത് സൂക്ഷിക്കാനുള്ള സൗകര്യവും സി.ബി.എസ്.ഇ ഒരുക്കിയിട്ടുണ്ട്. പരീക്ഷാഫലവുമായി ബന്ധപ്പെട്ട കൂടുതൽ ഔദ്യോഗിക വിവരങ്ങളും നിർദ്ദേശങ്ങളും സി.ബി.എസ്.ഇയുടെ വെബ്സൈറ്റില്‍ വിശദമായി ലഭ്യമാക്കിയിട്ടുണ്ടെന്നും അധികൃതർ അറിയിച്ചു.