കുമാരനല്ലൂർ സ്കൂളിൽ വേറിട്ട പ്രവേശനോത്സവം: അപേക്ഷ നൽകുന്നതിന് മുൻപ് കലാപ്രകടനം

പുതിയ അധ്യയന വർഷത്തിലേക്കുള്ള പ്രവേശന നടപടികളിൽ വ്യത്യസ്തമായ മാതൃകയുമായി കാരശ്ശേരി കുമാരനല്ലൂർ ജി.എൽ.പി. സ്‌കൂൾ. അപേക്ഷാ ഫോറം പൂരിപ്പിച്ച് മടങ്ങുന്ന പതിവ് രീതിക്ക് പകരം കുട്ടികളും രക്ഷിതാക്കളും ഒത്തുചേരുന്ന ഒരു കലോത്സവമായാണ് സ്കൂൾ അധികൃതർ 'അഡ്മിഷൻ ഡ്രൈവ് 0.1' സംഘടിപ്പിച്ചത്. സ്കൂളിലെത്തുന്ന കുട്ടികളും അവരുടെ മാതാപിതാക്കളും തങ്ങൾക്കറിയാവുന്ന കലാപരിപാടികൾ അവതരിപ്പിച്ച ശേഷമാണ് പ്രവേശന നടപടികളിലേക്ക് കടക്കുന്നത്. ഇവർക്കൊപ്പം അധ്യാപകരും കലാപ്രകടനങ്ങളിൽ പങ്കുചേരുന്നത് പരിപാടിയുടെ പകിട്ടു വർധിപ്പിച്ചു.

​സ്കൂളിലെത്തുന്ന കുരുന്നുകളെ ലഘുഭക്ഷണവും ജ്യൂസും നൽകിയാണ് അധ്യാപകരും പി.ടി.എ. ഭാരവാഹികളും സ്വീകരിച്ചത്. പ്രീ-പ്രൈമറി കുട്ടികൾക്കായി വിവിധ വിനോദ പരിപാടികളും സ്കൂൾ അങ്കണത്തിൽ ഒരുക്കിയിരുന്നു. എസ്.ബി.ഐ മുക്കം ബ്രാഞ്ചിന്റെ സഹകരണത്തോടെ സ്കൂൾ ബാഗുകളും പഠന കിറ്റുകളും കുട്ടികൾക്ക് വിതരണം ചെയ്തു. വാർഡ് മെമ്പർ മുഷീർ പട്ടാംകുന്നൻ ഉദ്ഘാടനം ചെയ്ത ചടങ്ങിൽ പി.ടി.എ ഭാരവാഹികളും ബാങ്ക് ഉദ്യോഗസ്ഥരും അധ്യാപകരും പങ്കെടുത്തു. പ്രവേശന നടപടികളെ കുട്ടികൾക്ക് ആനന്ദകരമായ അനുഭവമാക്കി മാറ്റാനുള്ള ഈ ശ്രമം രക്ഷിതാക്കളുടെയും പ്രശംസ പിടിച്ചുപറ്റി.