ജില്ലാ ക്രിയേറ്റീവ് ഫെസ്റ്റ്: ഉണ്ണികുളം ജി.യു.പി. സ്കൂളിന് കിരീടം

പൊതുവിദ്യാഭ്യാസ വകുപ്പിന് കീഴിൽ സമഗ്ര ശിക്ഷാ കേരളം (എസ്.എസ്.കെ.) സംഘടിപ്പിച്ച ക്രിയേറ്റീവ് കോർണറുകളുടെ ജില്ലാതല ഫെസ്റ്റിവലിൽ ബാലുശ്ശേരി ബി.ആർ.സി.ക്ക് കീഴിലുള്ള ഉണ്ണികുളം ജി.യു.പി. സ്കൂൾ ജേതാക്കളായി. മാവൂർ ജി.എം.യു.പി.എസ്. രണ്ടാം സ്ഥാനവും ചേന്ദമംഗലൂർ ജി.എം.യു.പി.എസ്. മൂന്നാം സ്ഥാനവും കരസ്ഥമാക്കി. പ്രൊഫ. കെ. പാപ്പൂട്ടി വിജയികൾക്ക് സമ്മാനങ്ങൾ വിതരണം ചെയ്തു. പഠനത്തോടൊപ്പം കുട്ടികളിലെ നൈപുണി വികസനം കൂടി ലക്ഷ്യമിട്ട് നടപ്പിലാക്കുന്ന ഈ പദ്ധതിയുടെ നിർവഹണ ഏജൻസി കൊച്ചിൻ ശാസ്ത്ര സാങ്കേതിക സർവകലാശാലയിലെ (കുസാറ്റ്) സെന്റർ ഫോർ സയൻസ് ഇൻ സൊസൈറ്റിയാണ്.

​എസ്.എസ്.കെ. ജില്ലാ പ്രോജക്ട് കോഡിനേറ്റർ ഡോ. എ.കെ. അബ്ദുൽ ഹക്കീമിന്റെ അധ്യക്ഷതയിൽ നടന്ന ചടങ്ങിൽ കുസാറ്റിലെ സയൻസ് ഇൻ സൊസൈറ്റി ഡയറക്ടർ ഡോ. പി. ഷൈജു, എസ്.എസ്.കെ. സ്റ്റേറ്റ് പ്രോഗ്രാം ഓഫീസർ ഡോ. ബി. ഷാജി, ഡയറ്റ് പ്രിൻസിപ്പൽ ഡോ. യു.കെ. അബ്ദുന്നാസർ, ഡി.പി.ഒ.മാരായ സജീഷ് നാരായണൻ, വി.ടി. ഷീബ എന്നിവർ പങ്കെടുത്തു. ജില്ലാ പ്രോഗ്രാം ഓഫീസർ അജയൻ പി.എൻ., വിദ്യാകിരണം കോഡിനേറ്റർ പ്രവീൺകുമാർ വി. തുടങ്ങിയവർ ആശംസകൾ നേർന്നു.