പഠനത്തിനൊപ്പം കാരുണ്യത്തിന്റെ പാഠവുമായി സെയ്ന്റ് ഫ്രാൻസിസ് സ്കൂൾ വിദ്യാർഥികൾ

പേരാമ്പ്ര സെയ്ന്റ് ഫ്രാൻസിസ് സ്കൂളിലെ വിദ്യാർഥികൾ തങ്ങളുടെ സമ്പാദ്യത്തിലൂടെ മാതൃകാപരമായ ഒരു ജീവകാരുണ്യ പ്രവർത്തനം കാഴ്ചവെച്ചിരിക്കുകയാണ്. ശിശുദിനാഘോഷങ്ങളുടെ ഭാഗമായും മറ്റും കുട്ടികൾ സമാഹരിച്ച തുക ഉപയോഗിച്ച് പ്രാദേശിക ആരോഗ്യ കേന്ദ്രങ്ങൾക്കായി നാല് ഓക്സിജൻ സിലിണ്ടറുകളാണ് ഇവർ വാങ്ങി നൽകിയത്. പഠനത്തിനൊപ്പം തന്നെ സമൂഹത്തോടുള്ള പ്രതിബദ്ധതയും നന്മയും ഉയർത്തിപ്പിടിക്കുന്നതാണ് വിദ്യാർഥികളുടെ ഈ നീക്കം.

​പേരാമ്പ്ര താലൂക്ക് ആശുപത്രി, ചക്കിട്ടപാറ അൽഫോൻസാ പാലിയേറ്റീവ് കെയർ, കൽപ്പത്തൂർ സുരക്ഷാ പെയിൻ ആൻഡ് പാലിയേറ്റീവ് സൊസൈറ്റി, നടുവണ്ണൂർ പെയിൻ ആൻഡ് പാലിയേറ്റീവ് കെയർ എന്നീ നാല് സ്ഥാപനങ്ങൾക്കാണ് ഈ സഹായം എത്തിച്ചുനൽകിയത്. താലൂക്ക് ആശുപത്രിയിൽ നടന്ന ചടങ്ങിൽ സ്കൂൾ പ്രധാനാധ്യാപിക സിസ്റ്റർ റോസിലി മെഡിക്കൽ ഓഫീസർ വി.എസ്. ദിവ്യക്ക് ഓക്സിജൻ സിലിണ്ടർ കൈമാറി. ചടങ്ങിൽ പി.ടി.എ പ്രസിഡന്റ് സുനിൽകുമാറും പങ്കെടുത്തു സംസാരിച്ചു.