വികസിത ഭാരതത്തിനായി സാങ്കേതികവിദ്യയുടെ പുതുമുഖം സൃഷ്ടിക്കണം -ധർമേന്ദ്ര പ്രധാൻ

പാലക്കാട്: 'വികസിത ഭാരതം -2047' ലക്ഷ്യത്തിലേക്കായി സാങ്കേതികവിദ്യയുടെ അന്താരാഷ്ട്ര നിലവാരമുള്ള പുതിയമുഖം സൃഷ്ടിക്കാനാവണമെന്ന് കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ. പാലക്കാട് ഐഐടിയിൽ ഏഴാമത് ബിരുദദാനച്ചടങ്ങിൽ സംസാരിക്കുകയായിരുന്നു അദ്ദേഹം.

ബിടെക് (151), എംടെക് (71), എംഎസ്‌സി (55), പിഎച്ച്‌ഡി (30), ഇരട്ടബിരുദം (8) വിഭാഗങ്ങളിലായി 328 പേരാണ് ബിരുദ സർട്ടിഫിക്കറ്റ് ഏറ്റുവാങ്ങിയത്. ഐഐടി ബോർഡ് ഓഫ് ഗവർണേഴ്‌സ് ചെയർമാൻ പ്രൊഫ രമേഷ് വെങ്കിടേശ്വരൻ അധ്യക്ഷനായി. ഐഐടി ഡയറക്‌ടർ പ്രൊഫ. എ. ശേഷാദ്രി ശേഖർ ബിരുദദാനം നിർവഹിച്ചു.

മികച്ച ബിടെക് വിദ്യാർഥിക്കുള്ള പുരസ്‌കാരം കംപ്യൂട്ടർ സയൻസ് ആൻഡ് എൻജിനിയറിങ്ങിലെ എൻ. നീരജ് കൃഷ്‌ണ ഏറ്റുവാങ്ങി. മികച്ച എംഎസ്സി വിദ്യാർഥിയായി ഫിസിക്‌സ് വിഭാഗത്തിൽനിന്ന് വിമൽ ശ്രീകാന്ത്, എംടെക് വിദ്യാർഥിയായി ജിയോടെക്നിക്കൽ എൻജിനിയറിങ്ങിലെ എം. ശിവകാമിദേവി എന്നിവരും പുരസ്കാരം സ്വീകരിച്ചു.