എസ്എസ്എൽസി വിജയം: ജില്ലയിൽ 99.58 %

തൊടുപുഴ എസ്.എസ്.എൽസി പരീക്ഷയിൽ ജില്ലയിൽ 99.58 ശതമാനം വിജയം. 1272 കുട്ടികൾ എല്ലാ വിഷയത്തിലും എ പ്ലസ് നേടി വിജയിച്ചു. 383 ആൺകുട്ടികൾക്കും 889 പെൺകുട്ടികൾക്കുമാണ് മുഴുവൻ വിഷയങ്ങൾക്കും എ പ്ലസ് ലഭിച്ചത്. വിജയശതമാനത്തിൽ സംസ്ഥാനത്ത് ഏഴാം സ്ഥാനത്താണ് ജില്ല.

5769 ആൺകുട്ടികളും 5446 പെൺകുട്ടികളുമുൾപ്പെടെ 11,215 കുട്ടികളാണ് ജില്ലയിൽ പരീക്ഷയെഴുതിയത്. ഇതിൽ 11,169 പേർ ഉപരിപഠനത്തിന് യോഗ്യത നേടി. 5740 ആൺകുട്ടികളും 5429 പെൺകുട്ടികളും വിജയിച്ചു. തൊടുപുഴ വിദ്യാഭ്യാസജില്ലയിൽ 4812 പേരും കട്ടപ്പനയിൽ 6357 പേരുമാണ് വിജയിച്ചത്. കഴിഞ്ഞ രണ്ട് വർഷങ്ങളെ അപേക്ഷിച്ച് വിജയശതമാനം ഇത്തവണ കുറവാണ്. കഴിഞ്ഞ രണ്ടുവർഷങ്ങളിൽ 99.79, 99.68 എന്നിങ്ങനെയായിരുന്നു ജില്ലയിലെ വിജയശതമാനം, കഴിഞ്ഞവർഷം 1573 കുട്ടികളാണ് എല്ലാ വിഷയങ്ങൾക്കും എ പ്ലസ് നേടിയത്.

138 സ്കൂ‌ളുകൾ നൂറുമേനി വിജയംകൊയ്‌തു. ഇതിൽ 68 സർക്കാർ, 62 എയ്ഡഡ്, എട്ട് അൺഎയ്‌ഡഡ് സ്കൂ‌ളുകളുണ്ട്. കഴിഞ്ഞ വർഷം 145 സ്കൂളുകൾക്കായിരുന്നു നൂറുമേനി വിജയം. സർക്കാർ സ്‌കൂളുകളിൽ കൂടുതൽ കുട്ടികൾ പരീക്ഷയെഴുതിയത് കല്ലാർ ഗവ. എച്ച്എസ്എസിലാണ്, 329 പേർ. ഇവിടെ എല്ലാവരും ജയിച്ചു. കുറവ് ഗവ. എച്ച്എസ്എസ് കുറ്റിപ്പങ്ങാടും, മൂന്നുപേർ.

എയ്ഡഡ് സ്കൂ‌ളുകളിൽ എസ്‌ജെഎച്ച്എസ്എസ് കരിമണ്ണൂരിലാണ് കൂടുതൽ വിദ്യർഥികൾ, 347 പേർ. കുറവ് എസ്‌ജിഎച്ച്എസ് മൂക്കുളത്തായിരുന്നു. ഇവിടെ പരീക്ഷയെഴുതിയ രണ്ടുപേരും വിജയിച്ചു. സർക്കാർ സ്കൂമുകളിൽ 2938 പേർ പരീക്ഷയെഴുതി. ഇതിൽ 2909 പേർ വിജയിച്ചു. 141 പേർക്ക് മുഴുവൻ വിഷയങ്ങൾക്കും എ പ്ലസുണ്ട്. എയ്‌ഡഡ് സ്‌കൂളുകളിൽ 7701 പേരാണ് പരീക്ഷയെഴുതിയത്. ഇവരിൽ 7683 പേരും ഉപരിപഠനത്തിന് യോഗ്യത നേടി. 1008 പേർക്ക് ഫുൾ എ പ്ലസ്. അൺ എയ്‌ഡഡ് സ്‌കൂളുകളിൽ പരീക്ഷയെഴുതിയ 580 പേരും വിജയിച്ചു. 123 പേർക്കാണ് എല്ലാ വിഷയങ്ങൾക്കും എ പ്ലസ് ലഭിച്ചത്.