രാമു കാര്യാട്ട്, ദക്ഷിണേന്ത്യൻ സിനിമയെ ലോകപ്രശസ്തമാക്കിയ പ്രതിഭ -മന്ത്രി

ഏങ്ങണ്ടിയൂർ : ദക്ഷിണേന്ത്യൻ സിനിമയെ ലോകത്തിന്റെ നെറുകെയിലെത്തിച്ച മഹാപ്രതിഭയാണ് രാമു കാര്യാട്ടെന്ന് മന്ത്രി കെ. രാജൻ പറഞ്ഞു. ചേറ്റുവയിൽ രാമു കാര്യാട്ട് സാംസ്കാരികനിലയത്തിന് ശിലയിടുകയായിരുന്നു അദ്ദേഹം. പുതിയ കലാകാരന്മാർക്ക് ഇടം നൽകുന്ന തിയേറ്റർകൂടി സ്മാരകത്തിൽ ഉണ്ടാകുന്നത് അഭിമാനകരമാണെന്നും മന്ത്രി കൂട്ടിച്ചേർത്തു.

ചേറ്റുവ വഴിയോരവിശ്രമകേന്ദ്രത്തിന് സമീപം നടന്ന ചടങ്ങിൽ എൻ.കെ. അക്ബർ എം.എൽ.എ. അധ്യക്ഷനായി. ഏങ്ങണ്ടിയൂർ ചന്ദ്രശേഖരൻ മുഖ്യപ്രഭാഷണം നടത്തി.

തളിക്കുളം ബ്ലോക്ക് പഞ്ചായത്ത് പ്രസിഡൻറ് കെ.സി. പ്രസാദ്, ഏങ്ങണ്ടിയൂർ പഞ്ചായത്ത് പ്രസിഡൻറ് ബിന്ദു സുരേഷ്, പഞ്ചായത്ത് വൈസ് പ്രസിഡൻറ് ബി.കെ. സുദർശൻ, മാധ്യമപ്രവർത്തകൻ എം.പി. സുരേന്ദ്രൻ, ബ്ലോക്ക് പഞ്ചായത്ത് വൈസ് പ്രസിഡൻറ് നിമിഷ അജീഷ്, ശാന്തി ഭാസി തുടങ്ങിയവർ പ്രസംഗിച്ചു.