നാലാം തവണയും മികച്ച നടനുള്ള ദേശീയ പുരസ്കാരം; രാഷ്ട്രപതിയിൽ നിന്ന് ഏറ്റുവാങ്ങി മമ്മൂട്ടി

അഹമ്മദാബാദ്: മലയാളത്തിന്റെ പ്രിയതാരം മമ്മൂട്ടി മികച്ച നടനുള്ള ദേശീയ പുരസ്കാരം രാഷ്ട്രപതി ദ്രൗപതി മുർമുവിൽ നിന്ന് ഏറ്റുവാങ്ങി. നാലാം തവണയാണ് മമ്മൂട്ടി മികച്ച നടനുള്ള ദേശീയ പുരസ്കാരത്തിന് അർഹനാകുന്നത്. 'ഭ്രമയുഗം' എന്ന ചിത്രത്തിലെ പ്രകടനത്തിനാണ് മമ്മൂട്ടി 72-ാമത് ദേശീയ ചലച്ചിത്ര പുരസ്കാരം സ്വന്തമാക്കിയത്. 'ചന്ദു ചാമ്പ്യൻ' എന്ന ചിത്രത്തിലൂടെ മമ്മൂട്ടിയോടൊപ്പം മികച്ച നടനുള്ള പുരസ്കാരം പങ്കിട്ട കാർത്തിക് ആര്യനും ചടങ്ങിൽ പുരസ്കാരം ഏറ്റുവാങ്ങി.

​ഗായിക വൈക്കം വിജയലക്ഷ്മി മികച്ച ഗായികയ്ക്കുള്ള പുരസ്കാരവും ഷഹനാദ് ജലാൽ മികച്ച ഛായാഗ്രാഹകനുള്ള പുരസ്കാരവും ഏറ്റുവാങ്ങി. യാമി ഗൗതം (മികച്ച നടി), കന്നഡ നടൻ അനന്ത് നാഗ് (ദാദാസാഹെബ് ഫാൽക്കെ പുരസ്കാരം) എന്നിവരും രാഷ്ട്രപതിയിൽ നിന്ന് പുരസ്കാരങ്ങൾ സ്വീകരിച്ചു. പതിവിൽ നിന്ന് വ്യത്യസ്തമായി തലസ്ഥാനത്തിന് പുറത്ത് ഗുജറാത്തിലെ കെവാദിയയിലുള്ള സ്റ്റാച്യു ഓഫ് യൂണിറ്റിക്ക് സമീപം ഒരുക്കിയ പ്രത്യേക വേദിയിലാണ് ചടങ്ങ് നടന്നത്.