സംസ്ഥാന ചലച്ചിത്ര അക്കാദമി ചെയർമാൻ സ്ഥാനം റസൂൽ പൂക്കുട്ടി രാജിവെച്ചു; ജഗദീഷ്, സലിം കുമാർ എന്നിവർ പരിഗണനയിൽ

തിരുവനന്തപുരം: സംസ്ഥാനത്ത് ഭരണമാറ്റം ഉണ്ടായ പശ്ചാത്തലത്തിൽ സംസ്ഥാന ചലച്ചിത്ര അക്കാദമി ചെയർമാൻ സ്ഥാനം ഓസ്കാർ ജേതാവ് റസൂൽ പൂക്കുട്ടി രാജിവെച്ചു. സ്ഥാനത്ത് തുടരാൻ പുതിയ യു.ഡി.എഫ് സർക്കാരിന്റെ ഭാഗത്തുനിന്നും നിർദേശമൊന്നും ലഭിക്കാത്ത സാഹചര്യത്തിലാണ് അദ്ദേഹം ചീഫ് സെക്രട്ടറിക്ക് രാജിക്കത്ത് കൈമാറിയത്. കഴിഞ്ഞവർഷം ഒക്ടോബറിലാണ് അന്നത്തെ പിണറായി വിജയൻ സർക്കാർ, നിലവിലുണ്ടായിരുന്ന ചെയർമാൻ പ്രേംകുമാറിനെ മാറ്റി റസൂൽ പൂക്കുട്ടിയെ ഈ പദവിയിലേക്ക് നിയമിച്ചത്. ഈ നിയമനം അന്ന് പ്രേംകുമാറിന്റെ കടുത്ത അതൃപ്തിക്ക് കാരണമായിരുന്നു.

​റസൂൽ പൂക്കുട്ടി ഒഴിഞ്ഞതോടെ ചലച്ചിത്ര അക്കാദമിയിലേക്ക് പുതിയ ചെയർമാനെ കണ്ടെത്താനുള്ള ചർച്ചകൾ സാംസ്കാരിക വകുപ്പ് ആരംഭിച്ചിട്ടുണ്ട്. കോൺഗ്രസ് അനുഭാവികളായ നടന്മാരായ ജഗദീഷ്, സലിം കുമാർ, സംവിധായകനും പ്രൊഫഷണൽ കോൺഗ്രസ് തിരുവനന്തപുരം ജില്ലാ പ്രസിഡന്റുമായ ദീപു കരുണാകരൻ എന്നിവരുടെ പേരുകളാണ് നിലവിൽ സർക്കാരിന്റെ സജീവ പരിഗണനയിലുള്ളത്. എന്നാൽ, നിലവിൽ സിനിമകളിൽ തിരക്കുള്ളതിനാൽ പദവികൾ ഏറ്റെടുക്കാനില്ലെന്ന നിലപാട് ജഗദീഷ് സാംസ്കാരിക വകുപ്പിനെ ഔദ്യോഗികമായി അറിയിച്ചിട്ടുണ്ട്.

​ഭരണമാറ്റത്തിന് പിന്നാലെ സാംസ്കാരിക പ്രവർത്തന ക്ഷേമനിധി ബോർഡ് ചെയർമാനായിരുന്ന സംവിധായകൻ മധുപാലും സ്ഥാനം രാജിവെച്ചിരുന്നു. അതേസമയം, ചലച്ചിത്ര വികസന കോർപറേഷൻ (കെ.എസ്.എഫ്.ഡി.സി) ചെയർമാൻ സ്ഥാനത്തുള്ള സംവിധായകൻ കെ. മധു ഇതുവരെ രാജിവെച്ചിട്ടില്ല. യു.ഡി.എഫുമായി അടുത്ത ബന്ധം പുലർത്തുന്ന കെ. മധു പദവിയിൽ തുടരുമോ അതോ രാജിവെക്കുമോ എന്ന കാര്യത്തിൽ വരും ദിവസങ്ങളിലേ വ്യക്തത വരൂ.