മോഹൻ രാഘവൻ ചലച്ചിത്ര പുരസ്‌കാര സമർപ്പണം

അന്നമനട തൻറെ ഒറ്റ സിനിമയിലൂടെ ചലച്ചിത്ര രംഗത്ത് അടയാളപ്പെടുത്തി പോയ സംവിധായകൻ മോഹൻ രാഘവൻ അനുസ്മരണവും പുരസ്‌കാര സമർപ്പണവും നടന്നു. ഓഫ്സ്റ്റേജ് അന്നമനട നൽകിവരുന്ന പതിന്നാലാമത് മോഹൻ രാഘവൻ ചലച്ചിത്ര പുരസ്‌കാരം വി‌ക്ടോറിയ സിനിമയുടെ സംവിധായിക ശിവരഞ്ജിനിക്കാണ് സമർപ്പിച്ചത്.

സംവിധായകൻ ടി.വി. ചന്ദ്രൻ ചലച്ചിത്ര പുരസ്‌കാരങ്ങൾ സമർപ്പിച്ചു. അനുസ്‌മരണ സമ്മേളനം സിനിമാനടൻ ടി.ജി. രവി ഉദ്ഘാടനം ചെയ്‌തു. അന്നമനട ഗ്രാമപ്പഞ്ചായത്ത് പ്രസിഡന്റ് സുനിതാ സജീവൻ അധ്യക്ഷയായി. പ്രമുഖ ഛായാഗ്രാഹകൻ കെ.ജി. ജയൻ ജൂറി റിപ്പോർട്ട് അവതരിപ്പിച്ചു. എഴുത്തുകാരിയും അഭിനേത്രിയുമായ ജോളി ചിറയത്ത് മുഖ്യപ്രഭാഷണം നടത്തി.

പി.കെ. കിട്ടൻ, പി.ടി. വിത്സൻ, അഭിനേത്രി മീനാക്ഷി ജയൻ, ഗ്രാമപ്പഞ്ചായത്ത് വൈസ് പ്രസിഡന്റ് പി.ഡി. ജോസ്, മുൻ ഗ്രാമപ്പഞ്ചായത്ത് പ്രസിഡൻ്റുമാരായ അഡ്വ. വി.വി. ജയരാമൻ, ടി.കെ. സതീശൻ, പി.വി. വിനോദ്, ഗ്രാമപ്പഞ്ചായത്തംഗം ജോബി പയ്യപ്പിള്ളി, ബാബുരാജ് അന്നമനട, വിഷ്ണു വടക്കേത്ത്, സുധീർ ബാബു, കെ.വി. ശ്യാം എന്നിവർ പ്രസംഗിച്ചു.