'അമ്മ' തലപ്പത്ത് വനിതകള്‍; ശ്വേത മേനോന്‍ പ്രസിഡന്റ്

സിനിമാ താരങ്ങളുടെ സംഘടനയായ 'അമ്മ'യുടെ പ്രസിഡന്റായി നടി ശ്വേതാ മേനോൻ തിരഞ്ഞെടുക്കപ്പെട്ടു. ചരിത്രത്തിലാദ്യമായാണ് സംഘടനയുടെ തലപ്പത്ത് ഒരു വനിത എത്തുന്നത്. വാശിയേറിയ തിരഞ്ഞെടുപ്പിൽ എതിർ സ്ഥാനാർത്ഥിയായിരുന്ന ദേവനെ പരാജയപ്പെടുത്തിയാണ് ശ്വേതാ മേനോൻ വിജയിച്ചത്. ഇതോടെ, അമ്മയുടെ താക്കോൽ സ്ഥാനങ്ങൾ ആദ്യമായി വനിതകൾക്ക് ലഭിച്ചു എന്ന പ്രത്യേകതയും ഈ തിരഞ്ഞെടുപ്പിനുണ്ട്.

തിരഞ്ഞെടുപ്പ് ഫലം

പ്രസിഡന്റ്: ശ്വേതാ മേനോൻ (159 വോട്ട്). എതിർ സ്ഥാനാർഥി ദേവന് 132 വോട്ടാണ് ലഭിച്ചത്.

ജനറൽ സെക്രട്ടറി: കുക്കു പരമേശ്വരൻ (172 വോട്ട്). രവീന്ദ്രനാണ് പരാജയപ്പെട്ടത്.

വൈസ് പ്രസിഡന്റുമാർ: ലക്ഷ്മിപ്രിയ (139 വോട്ട്), ജയൻ ചേർത്തല (267 വോട്ട്).

ജോയിന്റ് സെക്രട്ടറി: അൻസിബ.

ട്രഷറർ: ഉണ്ണി ശിവപാൽ.

പുതിയ ഭരണസമിതിയിൽ പ്രസിഡന്റ് ഉൾപ്പെടെ 17 അംഗങ്ങളിൽ എട്ടുപേരും വനിതകളാണ്. 248 വനിതാ അംഗങ്ങൾ ഉൾപ്പടെ സംഘടനയിലെ 504 അംഗങ്ങളിൽ 298 പേരാണ് വോട്ട് രേഖപ്പെടുത്തിയത്.

ശ്വേതാ മേനോന്റെ പ്രതികരണം: വിജയത്തിനുശേഷം പുറത്തിറങ്ങിയ ശ്വേതാ മേനോൻ, എല്ലാവർക്കും നന്ദി അറിയിച്ചു. 'അമ്മ ഒരു സ്ത്രീയായി' എന്ന് അവർ പ്രതികരിച്ചു. സംഘടനയിൽ നിന്ന് പിണങ്ങിപ്പോയവരെല്ലാം തിരികെ വരണമെന്നും, ആവശ്യമെങ്കിൽ അവരെ നേരിട്ട് വിളിക്കുമെന്നും അവർ പറഞ്ഞു. ജനറൽ സെക്രട്ടറിയായി തിരഞ്ഞെടുക്കപ്പെട്ട കുക്കു പരമേശ്വരൻ, എല്ലാ പ്രശ്നങ്ങളും ഒരുമിച്ച് കൈകാര്യം ചെയ്യുമെന്ന് വ്യക്തമാക്കി.