വിൽപ്പന മാത്രം പോരാ; വളർച്ചയുടെ വഴികൾ തിരിച്ചറിയണം ബിസിനസിനെ പുതിയ ഉയരങ്ങളിലേക്ക് നയിക്കാൻ ഡോ. സുധീർ ബാബുവിന്റെ The Revenue Multiplier

വിൽപ്പന മാത്രം പോരാ;

വളർച്ചയുടെ വഴികൾ തിരിച്ചറിയണം

ബിസിനസിനെ പുതിയ ഉയരങ്ങളിലേക്ക് നയിക്കാൻ ഡോ. സുധീർ ബാബുവിന്റെ The Revenue Multiplier

ഒരു ബിസിനസിന്റെ വിജയം അളക്കേണ്ടത് വിൽപ്പനയുടെ കണക്കുകൾ കൊണ്ടു മാത്രമാണോ? വരുമാനം വർധിപ്പിക്കാൻ നിരന്തരം അധ്വാനിക്കുന്നതിനപ്പുറം, കൈവരിച്ച നേട്ടങ്ങളെ പലമടങ്ങ് വളർച്ചയിലേക്ക് നയിക്കാൻ കഴിയുന്ന തന്ത്രങ്ങൾ കണ്ടെത്താനാകുന്നുണ്ടോ? സംരംഭകരും ബിസിനസ് രംഗത്ത് പ്രവർത്തിക്കുന്നവരും സ്വയം ചോദിക്കേണ്ട പ്രധാനപ്പെട്ട ചോദ്യങ്ങളാണിവ.

ഈ ചോദ്യങ്ങൾക്ക് പുതിയ കാഴ്ചപ്പാടുകളും പ്രായോഗികമായ ഉൾക്കാഴ്ചകളും പകരുകയാണ് ഡോ. സുധീർ ബാബുവിന്റെ The Revenue Multiplier: 40 Frameworks That Turn Sales Strategy Into Exponential Growth എന്ന പുസ്തകം. വിൽപ്പന വർധിപ്പിക്കുക എന്ന പതിവ് ലക്ഷ്യത്തിനപ്പുറം, നിലവിലുള്ള ബിസിനസ് സാധ്യതകളെ എങ്ങനെ കൂടുതൽ വരുമാനവും സുസ്ഥിര വളർച്ചയുമാക്കി മാറ്റാം എന്ന ചിന്തയാണ് പുസ്തകത്തിന്റെ കാതൽ.

ബിസിനസ് മാനേജ്മെന്റ് രംഗത്ത് മൂന്ന് പതിറ്റാണ്ടിലേറെ അനുഭവസമ്പത്തുള്ള ഡോ. സുധീർ ബാബു മാനേജ്മെന്റ് കൺസൾട്ടന്റും പരിശീലകനും എഴുത്തുകാരനുമാണ്. ഏഷ്യയിലെയും ഗൾഫ് മേഖലയിലെയും വിവിധ ബിസിനസ് മേഖലകളിലെ പ്രവർത്തനാനുഭവം സംരംഭങ്ങളുടെ വളർച്ച, വിപണന തന്ത്രങ്ങൾ, വരുമാനവർധന എന്നിവയെക്കുറിച്ച് പ്രായോഗികമായ ഉൾക്കാഴ്ചകൾ വികസിപ്പിക്കാൻ അദ്ദേഹത്തെ സഹായിച്ചിട്ടുണ്ട്. വിൽപ്പന, വിപണനം, വിലനിർണയം, ബിസിനസ് തന്ത്രങ്ങൾ എന്നിവയെ പരസ്പരം ബന്ധിപ്പിച്ച് സ്ഥാപനങ്ങളുടെ വളർച്ചയ്ക്ക് വഴിയൊരുക്കുന്ന സമീപനമാണ് അദ്ദേഹത്തിന്റെ രചനകളുടെ സവിശേഷത. സംരംഭകർക്കും ബിസിനസ് നേതൃത്വനിരയിലുള്ളവർക്കും പ്രയോജനപ്പെടുന്ന ആശയങ്ങൾ പങ്കുവയ്ക്കുന്ന അദ്ദേഹത്തിന്റെ ഒൻപതാമത്തെ പുസ്തകമാണിത്.

വരുമാനം വർധിപ്പിക്കുക എന്നത് ഓരോ സ്ഥാപനത്തിന്റെയും സ്വാഭാവിക ലക്ഷ്യമാണ്. എന്നാൽ കൂടുതൽ വിൽക്കുക, കൂടുതൽ പരസ്യം ചെയ്യുക, കൂടുതൽ ജീവനക്കാരെ നിയമിക്കുക തുടങ്ങിയ പതിവ് വഴികളിൽ മാത്രം ശ്രദ്ധ കേന്ദ്രീകരിച്ചാൽ മതിയോ? പരിമിതമായ വിഭവങ്ങൾ ഉപയോഗിച്ച് കൂടുതൽ ഫലം നേടാനും നിലവിലുള്ള അവസരങ്ങളെ പുതിയ വളർച്ചയുടെ വഴികളാക്കി മാറ്റാനും കഴിയണം. ഈ തിരിച്ചറിവിലേക്കാണ് പുസ്തകം വായനക്കാരെ നയിക്കുന്നത്.

വിൽപ്പനയെ വെറുമൊരു കച്ചവടപ്രക്രിയയായി കാണാതെ, ദീർഘകാല വളർച്ചയുടെ തന്ത്രപരമായ ഭാഗമായി സമീപിക്കുകയാണ് The Revenue Multiplier ചെയ്യുന്നത്. ഉപഭോക്താക്കളുടെ ആവശ്യങ്ങൾ മനസ്സിലാക്കുക, ഉൽപ്പന്നങ്ങളുടെയും സേവനങ്ങളുടെയും മൂല്യം ഉയർത്തുക, വിപണിയിലെ സാധ്യതകൾ തിരിച്ചറിയുക, ഓരോ ബിസിനസ് തീരുമാനവും വരുമാനത്തിൽ എങ്ങനെ പ്രതിഫലിക്കുന്നുവെന്ന് വിലയിരുത്തുക തുടങ്ങിയ കാര്യങ്ങൾക്ക് ഇതിൽ പ്രാധാന്യമുണ്ട്.

വലിയ മാറ്റങ്ങൾ സൃഷ്ടിക്കാൻ എല്ലായ്പ്പോഴും വലിയ നിക്ഷേപങ്ങൾ ആവശ്യമില്ല. ചിലപ്പോൾ പ്രവർത്തനരീതിയിലെ ചെറിയൊരു മാറ്റം, വിലനിർണയത്തിലെ കൃത്യമായ തീരുമാനം, ഉപഭോക്താക്കളോടുള്ള സമീപനത്തിലെ പുതുമ എന്നിവയ്ക്കുപോലും സ്ഥാപനത്തിന്റെ വളർച്ചയിൽ നിർണായകമായ സ്വാധീനം ചെലുത്താനാകും. അത്തരം സാധ്യതകളെ തിരിച്ചറിയാനും അവയെ വരുമാനവർധനയ്ക്കുള്ള തന്ത്രങ്ങളാക്കി മാറ്റാനും സഹായിക്കുന്ന 40 ചട്ടക്കൂടുകളാണ് പുസ്തകത്തിന്റെ തലക്കെട്ട് സൂചിപ്പിക്കുന്നത്.

ചെറുകിട സംരംഭകർ മുതൽ വൻകിട സ്ഥാപനങ്ങളുടെ മാനേജ്മെന്റ് നേതൃത്വത്തിലുള്ളവർ വരെ ഒരുപോലെ പ്രസക്തിയോടെ സമീപിക്കാവുന്ന വിഷയങ്ങളാണ് പുസ്തകം കൈകാര്യം ചെയ്യുന്നത്. സംരംഭകത്വത്തിലേക്ക് കടക്കാൻ ആഗ്രഹിക്കുന്ന യുവാക്കൾക്കും വിൽപ്പന-വിപണന രംഗത്ത് പ്രവർത്തിക്കുന്നവർക്കും മാനേജ്മെന്റ് വിദ്യാർഥികൾക്കും ഇതിലെ ആശയങ്ങൾ പ്രയോജനപ്പെടും.

കൂടുതൽ അധ്വാനിക്കുക എന്നതിലുപരി, ചെയ്യുന്ന അധ്വാനത്തിന് കൂടുതൽ മൂല്യം സൃഷ്ടിക്കുക എന്നതാണ് വളർച്ചയുടെ യഥാർഥ രഹസ്യം. വരുമാനം വർധിപ്പിക്കാനുള്ള വഴികൾ തേടുന്നവർക്ക് മാത്രമല്ല, സ്വന്തം പ്രവർത്തനരീതികളെ പുനഃപരിശോധിച്ച് കൂടുതൽ കാര്യക്ഷമവും സുസ്ഥിരവുമായ വളർച്ച ലക്ഷ്യമിടുന്നവർക്കും പുതിയ ചിന്തകൾ പകരുന്ന വായനാനുഭവമാകാം The Revenue Multiplier.

വളർച്ച ആഗ്രഹിക്കുന്നവർക്ക് വായനയും ഒരു നിക്ഷേപമാണ്.

പുസ്തകം: The Revenue Multiplier

രചയിതാവ്: ഡോ. സുധീർ ബാബു

പ്രസാധകർ: PEN GLOBAL

വില: ₹699

: ദിവാകരൻ ചോമ്പാല