ഇൻഡിഗോയും കേന്ദ്ര ടൂറിസം മന്ത്രാലയവും കൈകോർക്കുന്നു; ‘ഇൻക്രെഡിബിൾ ഇന്ത്യ ബൈ ഇൻഡിഗോ’ ആഗോള ടൂറിസം പ്രചാരണത്തിന് തുടക്കം

ലോകമെമ്പാടുമുള്ള സഞ്ചാരികളെ ഇന്ത്യയിലേക്ക് ആകർഷിക്കാൻ സംയുക്ത സംരംഭം; ഇന്ത്യയുടെ പൈതൃകവും പ്രകൃതി ഭംഗിയും നവീന മുഖവും പ്രദർശിപ്പിക്കും

കൊച്ചി: ഇന്ത്യയിലെ മുൻനിര വിമാനക്കമ്പനിയായ ഇൻഡിഗോയും കേന്ദ്ര ടൂറിസം മന്ത്രാലയവും ചേർന്ന് ‘ഇൻക്രെഡിബിൾ ഇന്ത്യ ബൈ ഇൻഡിഗോ’ എന്ന ആഗോള ടൂറിസം പ്രചാരണ പദ്ധതിക്ക് തുടക്കമിട്ടു. ഇതിന്റെ ഭാഗമായി ധാരണാപത്രത്തിൽ (MoU) ഇരുപക്ഷവും ഒപ്പുവച്ചു. ലോകമെമ്പാടുമുള്ള വിനോദസഞ്ചാരികളെ ഇന്ത്യയിലേക്ക് ആകർഷിക്കുക എന്ന ലക്ഷ്യത്തോടെയാണ് പദ്ധതി നടപ്പാക്കുന്നത്.

ഇന്ത്യയുടെ സാംസ്‌കാരിക വൈവിധ്യം, സമ്പന്നമായ പൈതൃകം, പ്രകൃതി സൗന്ദര്യം, വ്യത്യസ്തമായ വിനോദസഞ്ചാര അനുഭവങ്ങൾ എന്നിവ അന്താരാഷ്ട്ര യാത്രികർക്കു പരിചയപ്പെടുത്തുന്നതിനൊപ്പം, നവീന ഇന്ത്യയുടെ സംരംഭകത്വം, സാങ്കേതിക മുന്നേറ്റം, സൃഷ്ടിപരമായ വളർച്ച എന്നിവയും ഈ പദ്ധതിയിലൂടെ ലോകത്തിന് മുന്നിലെത്തിക്കും.

ഇപ്പോൾ ഇൻഡിഗോയ്ക്ക് രാജ്യത്തിനകത്തെ 95-ലധികം നഗരങ്ങളിലേക്കും വിദേശത്തെ 40-ലധികം കേന്ദ്രങ്ങളിലേക്കും സർവീസുകളുണ്ട്. കൂടാതെ 13 കോഡ്‌ഷെയർ പങ്കാളിത്തങ്ങളിലൂടെ ലോകത്തെ 95-ലധികം നഗരങ്ങളിൽ നിന്ന് ഇന്ത്യയിലെ വിവിധ കേന്ദ്രങ്ങളിലേക്ക് സുഗമമായ യാത്രാസൗകര്യവും കമ്പനി ഒരുക്കുന്നുണ്ട്.

രാജ്യത്തെ ജനങ്ങളെയും സ്ഥലങ്ങളെയും ബന്ധിപ്പിച്ച് രണ്ട് പതിറ്റാണ്ട് പൂർത്തിയാക്കുന്ന വേളയിലാണ് ഇൻഡിഗോ ഈ പുതിയ ആഗോള ടൂറിസം സംരംഭത്തിന് തുടക്കമിടുന്നത്. ഇതിന്റെ ഭാഗമായി ഇന്ത്യയുടെ മനോഹരമായ പ്രകൃതിദൃശ്യങ്ങളും വൈവിധ്യമാർന്ന വിനോദസഞ്ചാര അനുഭവങ്ങളും ഉൾക്കൊള്ളുന്ന പ്രത്യേക പ്രചാരണ വീഡിയോയും ഇൻഡിഗോ പുറത്തിറക്കി.

ഇൻഡിഗോയുടെ ചീഫ് ഡിജിറ്റൽ ആൻഡ് ഇൻഫർമേഷൻ ഓഫീസർ നീതൻ ചോപ്ര പറഞ്ഞു:

"ഇന്ത്യയുടെ കഥ അതിന്റെ സമ്പന്നമായ പൈതൃകത്തിലും പ്രശസ്തമായ വിനോദസഞ്ചാര കേന്ദ്രങ്ങളിലുമാത്രം ഒതുങ്ങുന്നതല്ല. പാരമ്പര്യവും നവീകരണവും, ചരിത്രവും പുരോഗതിയും സമന്വയിപ്പിച്ച ഇന്ത്യയെ ലോകത്തിന് പരിചയപ്പെടുത്താൻ ടൂറിസം മന്ത്രാലയവുമായി കൈകോർക്കുന്നതിൽ അഭിമാനമുണ്ട്. സംരംഭകത്വം, സാങ്കേതികവിദ്യ, സർഗാത്മകത എന്നിവയുടെ ആഗോള കേന്ദ്രമായി ഇന്ത്യ ഉയരുന്ന സാഹചര്യത്തിൽ രാജ്യത്തിന്റെ അതുല്യമായ പാരമ്പര്യവും അനന്തമായ സാധ്യതകളും ലോകസഞ്ചാരികൾക്ക് ഈ പദ്ധതി പരിചയപ്പെടുത്തും."

ഈ സംരംഭത്തിന്റെ ഭാഗമായി ഇൻഡിഗോയും കേന്ദ്ര ടൂറിസം മന്ത്രാലയവും ചേർന്ന് വിവിധ വിനോദസഞ്ചാര കേന്ദ്രങ്ങളെ ആസ്പദമാക്കിയുള്ള പ്രചാരണ ഉള്ളടക്കങ്ങളും ഡിജിറ്റൽ, പ്രിന്റ്, ഓഫ്‌ലൈൻ പ്രചാരണ സാമഗ്രികളും തയ്യാറാക്കും. ഇൻഡിഗോയുടെ വിമാനയാത്രാ സേവനങ്ങളും ഡിജിറ്റൽ പ്ലാറ്റ്‌ഫോമുകളും ഉപയോഗപ്പെടുത്തി കൂടുതൽ വിദേശ സഞ്ചാരികളെ ഇന്ത്യ സന്ദർശിക്കാൻ പ്രോത്സാഹിപ്പിക്കുമെന്നും അധികൃതർ അറിയിച്ചു.

ഇൻഡിഗോയുടെ അന്താരാഷ്ട്ര ശൃംഖലയിലെ പ്രധാന നഗരങ്ങളെയും വിനോദസഞ്ചാര വിപണികളെയും ലക്ഷ്യമിട്ട് വിവിധ മാധ്യമങ്ങളിലൂടെ ഈ ആഗോള പ്രചാരണ പരിപാടി ഘട്ടംഘട്ടമായി നടപ്പാക്കും.