ചെമ്പൈ ഏകാദശി സംഗീതോത്സവം തുടങ്ങി; ഇന്ന് എൻ.ജെ. നന്ദിനിയുടെ കച്ചേരി

പാലക്കാട് ചെന്പൈ അഗ്രഹാരത്തിലെ പാർഥസാരഥി ക്ഷേത്രത്തിലെ ഏകാദശി ഉത്സവത്തോടനുബന്ധിച്ചുള്ള സംഗീതോത്സവം തുടങ്ങി. ടി.വി. ഗോപാലകൃഷ്ണൻ്റെ കച്ചേരിയോടെയാണു തുടക്കമായത്.

കൊടുന്തിരപ്പുള്ളി സുബ്ബരാമൻ (വയലിൻ), കുഴൽമന്ദം രാമകൃഷ്‌ണൻ (മൃദംഗം), ദീപു ഏലംകുളം (ഘടം), വെള്ളിനേഴി രമേഷ് (മുഖർശംഖ്) എന്നിവർ പക്കമേളമൊരുക്കി. തുടർന്നു സുകുമാരി നരേന്ദ്രൻ്റെ നേതൃത്വത്തിൽ കച്ചേരിയുണ്ടായി. ജയദേവൻ ഒറ്റപ്പാലം (വയലിൻ), ആലുവ ഗോപാലകൃഷ്ണ‌ൻ (മൃദംഗം), വെള്ളിനേഴി രമേഷ് (മുഖർശംഖ്) എന്നിവർ പക്കമേളമൊരുക്കി.

ഞായറാഴ്ച വൈകീട്ട് ആറിന് എൻ.ജെ. നന്ദിനിയും തുടർന്ന് ആനയടി പ്രസാദും കുച്ചേരി അവതരിപ്പിക്കും.

തിങ്കളാഴ്ച മണ്ണൂർ രാജകുമാരനുണ്ണിയും സംഘവും അവതരിപ്പിക്കുന്ന പഞ്ചരത്നകീർത്തനാലാപനമുണ്ടാവും. വൈകിട്ട് ആറിന് ഡോ. പി. പദ്‌മേഷിന്റെ ഓടക്കുഴൽ കച്ചേരി, ഏഴിന് ഫാ. പോൾ പൂവത്തിങ്കലിൻ്റെ കച്ചേരി, 7.30-ന് പ്രകാശ് ഉള്ളേരിയും സൗന്ദരരാജനും ചേർന്ന് അവതരിപ്പിക്കുന്ന ഹാർമോണിയം-വീണ സംഗീതസമന്വയം എന്നിവയുണ്ടാവും. 8.30-ന് വിജയ് യേശുദാസിന്റെ കച്ചേരി, 9.30-ന് സി.എസ്. അനുരൂപും പാർവതി ദിലീപും വയലിൻ കച്ചേരി അവതരിപ്പിക്കും.