ദേശീയ ഗെയിംസ് ഫുട്ബോൾപുതുനിരയെ അണിനിരത്തി കേരളം

കല്പറ്റ : സന്തോഷ് ട്രോഫിക്ക് പിന്നാലെ ദേശീയ ഗെയിംസ് ഫുട്ബോൾ മത്സരത്തിലും പുതുനിരയെ അണിനിരത്തി കപ്പടിക്കാനുള്ള ഒരുക്കത്തിലാണ് കേരളം. 22 അംഗ ടീമിൽ 19 പേരും ആദ്യമായാണ് കേരളത്തിനുവേണ്ടി ജഴ്സി അണിയുന്നത്.

നാലുപേർ റിസർവിലുമുണ്ട്. ദേശീയമത്സരത്തിന് മുന്നോടിയായി മരവയലിലെ എം.കെ. ജിനചന്ദ്രൻ സ്മാരക ജില്ലാസ്റ്റേഡിയത്തിൽ പരിശീലനത്തിലാണ് ടീമംഗങ്ങൾ.

മേപ്പാടി കാപ്പംകൊല്ലി പാലവയൽ സ്വദേശിയും സൂപ്പർലീഗ് കേരളയിൽ കണ്ണൂർ വാരിയേഴ്സിന്റെ സഹപരിശീലകനുമായിരുന്ന എം. ഷഫീഖ് ഹസനാണ് കേരളടീമിന്റെ മുഖ്യപരിശീലകൻ. വയനാട് യുണൈറ്റഡ് എഫ്.സി.യുമായി ഇതിനോടകം പരിശീലനമത്സരവും ടീം നടത്തിക്കഴിഞ്ഞു. ബുധനാഴ്ച ഗോകുലം എഫ്.സി.യുമായും പരിശീലനമത്സരം നടത്തും. ഹൈദരാബാദിൽ നടന്ന സന്തോഷ് ട്രോഫിയിൽ റണ്ണറപ്പായതിന് പിന്നാലെയാണ് ദേശീയഗെയിംസിലും കേരളം പുതുനിരയെ പരീക്ഷിക്കുന്നത്.