എഴുത്തുകാരൻ എഴുതുന്നത് കാലഘട്ടത്തിന്റെ ബോധ്യത്തിൽനിന്ന്-കെ.വി.മോഹൻകുമാർ

കൊല്ലം : എഴുത്തുകാരൻ എഴുതുന്നത് കാലഘട്ടത്തിന്റെ ബോധ്യത്തിൽനിന്നാണെന്ന് നോവലിസ്റ്റ് കെ.വി.മോഹൻകുമാർ. ഏതൊരു സാഹിത്യകൃതിയും കാലത്തെ അതിജീവിക്കണമെങ്കിൽ വായനാസമൂഹം അത് ഏറ്റെടുക്കണമെന്നും അദ്ദേഹം പറഞ്ഞു.

കടപ്പാക്കട കാമ്പിശ്ശേരി കരുണാകരൻ ലൈബ്രറിയുടെ നേതൃത്വത്തിൽ കെ.വി.മോഹൻകുമാർ രചിച്ച 'ഉല' നോവലിന്റെ പുസ്തകചർച്ചയിൽ സംസാരിക്കുകയായിരുന്നു അദ്ദേഹം.

സ്മൃതികൾ പേറുന്ന കാലഘട്ടത്തെക്കുറിച്ച് എഴുതുകയെന്നത് ഒരു എഴുത്തുകാരന്റെ ദൗത്യമാണെന്നും ലോകമെമ്പാടും തലപൊക്കുന്ന നവ ഫാസിസത്തിന്റെ പുതിയ പ്രവണതകളാണ് ഉല എഴുതാനുണ്ടായ സാഹചര്യമെന്നും കെ.വി.മോഹൻകുമാർ വ്യക്തമാക്കി.

ഇളവൂർ ശ്രീകുമാർ, ഡോ. നിത്യ പി.വിശ്വം, പി.ഉഷാകുമാരി, സിദ്ധാർത്ഥൻ എന്നിവർ ചർച്ചയിൽ പങ്കെടുത്തു. ലൈബ്രറി പ്രസിഡന്റ് സി.ആർ.ജോസ് പ്രകാശ് അധ്യക്ഷനായി. ജോയിൻറ്‌ സെക്രട്ടറി ജയൻ മഠത്തിൽ, സെക്രട്ടറി പി.എസ്.സുരേഷ്, വൈസ് പ്രസിഡൻറ് ജി.ബിജു എന്നിവർ സംസാരിച്ചു.