അണ്ടർ-20 സംസ്ഥാന ഫുട്‌ബോൾ ചാമ്പ്യൻഷിപ്പ്

കല്പറ്റ : ആവേശം നിറച്ച് അണ്ടർ-20 സംസ്ഥാന ഫുട്‌ബോൾ ചാമ്പ്യൻഷിപ്പ്. രണ്ടാംദിവസമായ വെള്ളിയാഴ്ച നടന്ന മത്സരത്തിൽ കോഴിക്കോടും ഇടുക്കിയും ജേതാക്കളായി. ഇടുക്കിയും കണ്ണൂരും തമ്മിലായിരുന്നു ആദ്യമത്സരം.

ഒന്നിനെതിരേ രണ്ടുഗോളുകൾക്കായിരുന്നു ഇടുക്കിയുടെ വിജയം. ആദ്യപകുതിയുടെ അവസാനമിനിറ്റിലാണ് ഇടുക്കി ആദ്യഗോളടിച്ചത്. ഇടുക്കിയുടെ മുന്നേറ്റതാരം മുഹമ്മദ് നായിഫാണ് ഗോളടിച്ചത്. 57-ാം മിനിറ്റിൽ ഇടുക്കി വീണ്ടും ലീഡെടുത്തു. മധ്യനിര താരം ലിസ്ബൻ ലിൻസോയാണ് ഗോളടിച്ചത്. കളിയുടെ 82-ാം മിനിറ്റിൽ കണ്ണൂരിന്റെ മുന്നേറ്റതാരം അങ്കിത് ഹരീന്ദ്രൻ ഒരു ഗോൾ തിരിച്ചടിച്ചു. കോഴിക്കോടും പാലക്കാടും തമ്മിലായിരുന്നു രണ്ടാമത്തെ മത്സരം.

പാലക്കാടിനെതിരേ രണ്ടുഗോളുകൾക്കാണ് കോഴിക്കോടിന്റെ ജയം.

ശനിയാഴ്ച വൈകീട്ട് 4.30-ന് കൊല്ലവും എറണാകുളവും തമ്മിലാണ് മത്സരം. വൈകീട്ട് ഏഴിന് അതിഥേയരായ വയനാടും ഇടുക്കിയും തമ്മിൽ ഏറ്റുമുട്ടും. മരവയലിലെ എം.കെ. ജിനചന്ദ്രൻ സ്മാരക ജില്ലാ സ്റ്റേഡിയത്തിലാണ് ഫുട്‌ബോൾ ചാമ്പ്യൻഷിപ്പ് നടക്കുന്നത്. 19 വരെയാണ് മത്സരം.