ഒരിലയും താഴേക്ക് നോക്കി കൈമലർത്തുന്നില്ല... : സത്യൻ മാടാക്കര

ഒരിലയും താഴേക്ക് നോക്കി

കൈമലർത്തുന്നില്ല...

: സത്യൻ മാടാക്കര

പകലിലാണിപ്പോൾ

ഇരുട്ടിൻ്റെ നടത്തം

ഒറ്റപ്പെടലിൽ

സ്വന്തം നിഴൽ പേടിപ്പിക്കുന്നു

മുറി, എഴുത്ത് മേശ, അടുക്കള

കീശയില്ലാത്ത കുപ്പായം

ദരിദ്രൻ്റെ ജീവിതാദർശം

വീടുകൾക്കെല്ലാം ഒരേ മതിൽ

ഏത് ഭക്ഷണത്തിനും

ഒരേ വായ് രുചി

കൈയിലുള്ളത്

മനുഷ്യത്വത്തിൻ്റെ നാക്കില

വിത്ത് മുളച്ച് ആൽമരമായാലും

മണ്ണ് ആലയിൽ കുടങ്ങളായാലും

ഉപ്പ് വെള്ളത്തിലലിഞ്ഞാലും

വിത്ത് മണ്ണ് ഉപ്പ് ഇല്ലാതാകുന്നില്ല

'ശൂ' എന്ന ഒച്ചക്കാരൻ കാറ്റ്

കത്തിത്തീരാത്ത വിളക്കായ സൂര്യൻ

കുടിച്ചു വറ്റിയ്ക്കാനാവാത്ത കടൽ

ആർക്കും സ്വന്തമാക്കാനാവില്ല.

മണ്ണ് പറയുന്നു.

ഒരിലയും താഴേക്ക് നോക്കി കൈമലർത്തുന്നില്ല

മഴ കഴുകി വൃത്തിയാക്കിയ

ആകാശത്തിലാണതിൻ്റെ നോട്ടം

മനുഷ്യാലയമേ,

മനസ്സിലൊരു ബുദ്ധ പീഠo ഒരുക്കുക