ക്രിസ്റ്റ്യാനോ റൊണാൾഡോ അന്താരാഷ്ട്ര ഫുട്‌ബോളിൽനിന്ന് വിരമിച്ചു; പടിയിറങ്ങുന്നത് 23 വർഷത്തെ ഇതിഹാസ തുല്യമായ കരിയറിന് വിരാമമിട്ട്

അന്താരാഷ്ട്ര ഫുട്‌ബോളിന് കണ്ണീരോടെയും അഭിമാനത്തോടെയും വിടപറഞ്ഞ് പോർച്ചുഗീസ് ഇതിഹാസം ക്രിസ്റ്റ്യാനോ റൊണാൾഡോ. സമൂഹമാധ്യമങ്ങളിൽ പങ്കുവെച്ച വിഡിയോ സന്ദേശത്തിലൂടെയാണ് താരം ദേശീയ ടീമിൽ നിന്നുള്ള പടിയിറക്കം ഔദ്യോഗികമായി പ്രഖ്യാപിച്ചത്. ഖത്തർ ലോകകപ്പിന് ശേഷം മെസ്സിയും നെയ്മറും അന്താരാഷ്ട്ര ഫുട്‌ബോളിൽനിന്ന് വിരമിച്ചതിന് പിന്നാലെയാണ് മറ്റൊരു ഫുട്‌ബോൾ ഇതിഹാസവും കളിക്കളത്തോട് വിടപറയുന്നത്.

​യുവേഫ നേഷൻസ് ലീഗ് ഫുട്‌ബോളിൽ കോച്ചുമായി ഉണ്ടായ അഭിപ്രായവ്യത്യാസങ്ങളെ തുടർന്ന് ക്രിസ്റ്റ്യാനോ ടീം ക്യാമ്പ് വിട്ടത് വലിയ ചർച്ചയായിരുന്നു. തുടർന്ന് താരത്തിന് ഒരു മാസത്തെ വിലക്കും പിഴയും ഏർപ്പെടുത്തിയിരുന്നെങ്കിലും, നവംബർ വിൻഡോയിലെ മത്സരങ്ങളിലേക്ക് തിരിച്ചെത്താൻ കഴിയുമായിരുന്നു. ഇതിനിടയിലാണ് രാജ്യത്തിനായി ഇനി പന്തുതാനില്ലെന്ന നിർണായക പ്രഖ്യാപനം താരത്തിന്റെ ഭാഗത്തുനിന്നും ഉണ്ടായിരിക്കുന്നത്.

​23 വർഷം നീണ്ട പ്രതാപപൂർണമായ കരിയർ

​2003 ഓഗസ്റ്റിൽ കസാഖിസ്ഥാനെതിരായ മത്സരത്തിൽ സബ്സ്റ്റിറ്റ്യൂട്ടായി ഇറങ്ങി അന്താരാഷ്ട്ര അരങ്ങേറ്റം കുറിച്ച ക്രിസ്റ്റ്യാനോ, പിന്നീട് ഫുട്‌ബോൾ ചരിത്രത്തിലെ എക്കാലത്തെയും മികച്ച ഗോൾവേട്ടക്കാരിലൊരാളായി മാറുകയായിരുന്നു. പോർച്ചുഗലിനായി 234 മത്സരങ്ങളിൽ നിന്ന് 146 ഗോളുകളാണ് താരം നേടിയത്. അഞ്ച് ബാലൻ ഡി ഓർ പുരസ്‌കാരങ്ങൾ, മൂന്ന് യുവേഫ മെൻസ് പ്ലെയർ ഓഫ് ദി ഇയർ പുരസ്‌കാരങ്ങൾ, നാല് യൂറോപ്യൻ ഗോൾഡൻ ബൂട്ടുകൾ എന്നിവയുൾപ്പെടെ നിരവധി റെക്കോർഡുകളും നേട്ടങ്ങളും സ്വന്തമാക്കിയാണ് ഈ മടക്കം.

​ഹൃദയത്തുടിപ്പായി മാറിയ 'ഏഴാം നമ്പർ' ജേഴ്സി

​ഐക്കണിക് ആയ 7-ാം നമ്പർ ജേഴ്സി അടുത്ത തലമുറയ്ക്ക് കൈമാറാൻ സമയമായെന്ന് വൈകാരികമായ വിടവാങ്ങൽ സന്ദേശത്തിൽ ക്രിസ്റ്റ്യാനോ പറഞ്ഞു.

​'പോർച്ചുഗീസുകാരായ ജനങ്ങളോട് എനിക്ക് പറയാനുള്ളത്, നമ്മുടെ ദേശീയ ടീമിന്റെ 7-ാം നമ്പർ ജേഴ്‌സി തിരിച്ചേൽപ്പിക്കാനുള്ള ദിവസം വന്നെത്തിയിരിക്കുന്നു. 23 വർഷക്കാലം, അത് അണിയാനും, അതിനായി പോരാടാനും, ലോകമെമ്പാടുമുള്ള സ്റ്റേഡിയങ്ങളിലേക്ക് അത് ധരിച്ചുകൊണ്ട് ഇറങ്ങാനുമുള്ള ഭാഗ്യവും ഉത്തരവാദിത്തവും എനിക്കുണ്ടായിരുന്നു. ഇന്ന്, അത് വരുംതലമുറയ്ക്ക് കൈമാറാനുള്ള സമയം ആയിരിക്കുന്നു,' -ക്രിസ്റ്റ്യാനോ പറഞ്ഞു.

​ഗോളുകളും ട്രോഫികളും റെക്കോർഡുകളും താൽക്കാലികമാണെന്നും എന്നാൽ ആളുകളുടെ ഹൃദയങ്ങളിൽ താൻ അവശേഷിപ്പിക്കുന്ന സ്ഥാനമാണ് ഏറ്റവും വലുതെന്നും അദ്ദേഹം ഓർമിച്ചു. തന്റെ ടീമംഗങ്ങൾക്കും പരിശീലകർക്കും സപ്പോർട്ട് സ്റ്റാഫുകൾക്കും ഒപ്പം താങ്ങായി നിന്ന കുടുംബത്തിനും താരം നന്ദി അറിയിച്ചു. അന്താരാഷ്ട്ര ഫുട്‌ബോളിൽ നിന്ന് വിരാമമിട്ടെങ്കിലും ഒരു ആരാധകനായി എന്നും താൻ പോർച്ചുഗൽ ടീമിനൊപ്പം ഉണ്ടാകുമെന്ന് വ്യക്തമാക്കിയാണ് ക്രിസ്റ്റ്യാനോ തന്റെ വിടവാങ്ങൽ സന്ദേശം അവസാനിപ്പിച്ചത്.