പരാജിത നായകരും തമിഴ് താരരാഷ്ട്രീയത്തിന്റെ ഭാഗധേയവും

എവിടെയും തെളിഞ്ഞും തിളങ്ങിയും നിറയുന്ന വിജയികളുടെ ത്രിമാന ചിത്രങ്ങൾ നമ്മുടെയൊക്കെ കണ്ണിൽ തടയാറുണ്ട്. എന്നാൽ അവിടങ്ങളിലൊക്കെ എണ്ണമറ്റ മാനങ്ങളോടെ നിശ്ശബ്ദം വിനിമയം ചെയ്യുന്ന പരാജിതരും മറഞ്ഞു നില്പുണ്ട്. പക്ഷേ ആരും അവരെ തിരിച്ചറിയാറില്ല എന്ന് മാത്രമല്ല ചരിതം വിജയികളുടെ കുതിരക്കുളമ്പടികളെയാണ് പിന്തുടരുന്നത്. ഒരു പക്ഷേ, പരാജിതർ തങ്ങളുടെ മുന്നോട്ടുള്ള കുതിപ്പിനിടയിൽ അദൃശ്യരോ അപ്രസ്ക്തരോ ആയി രൂപം മാറിക്കാണും. അതിനാൽ വെറുംനോട്ടങ്ങൾക്ക് അവരെ അരിച്ചെടുക്കാൻ പ്രാപ്തിയുണ്ടാവില്ല. അവിടെയാണ് മാധ്യമ പ്രവർത്തകനും, എഡിറ്ററും എഴുത്തുകാരനുമായ ടി . അനീഷ് തന്റെ സൂക്ഷ്മ നിരീക്ഷണങ്ങളുടെയും, അന്വേഷണാത്മകമായ സർഗ്ഗാത്മകതയുടേയും തെളിച്ചത്തിൽ ആവിഷ്‌കരിച്ച  'പരാജിത നായകർ' -തമിഴ് രാഷ്ട്രീയത്തിന്റെ കഥ - എന്ന മികച്ച രചനയുടെ പ്രസക്തി.

ഈ പുസ്തകത്തിലൂടെ എഴുത്തുകാരൻ താര രാഷ്ട്രീയത്തിന്റെ സർവ്വകലാശാല എന്ന് വിശേഷിപ്പിക്കാവുന്ന തമിഴകത്തിലെ, രാഷ്ട്രീയഭാഗ്യാന്വേഷികളായി പരിണമിച്ച ചലച്ചിത്ര താരങ്ങളുടെ രാഷ്ട്രീയ ചരിത്രത്തെയാണ് അപനിർമ്മിക്കുന്നത്. രാഷ്ട്രീയ പരീക്ഷണങ്ങളിൽ മുഴുകിയും മുങ്ങിയും നീന്തിയും തോൽവി സമ്മതിച്ച് പിൻവലിഞ്ഞും മണ്മറഞ്ഞു പോയവരും അല്ലാത്തവരുമായ താരരാജാക്കന്മാരെ അതാതു കാലത്തെയും അവരവരുടെ സഞ്ചാര വഴികളെയും ചേർത്തു വച്ച് അപഗ്രഥിക്കാനുള്ള സഫലമായ ശ്രമമാണ് ഈ കൃതി.

എം ജി ആർ, ജയലളിത, വിജയ് എന്നിവർ രാഷ്ട്രീയ പരീക്ഷണത്തിൽ വിജയിച്ച താരങ്ങളാണെന്നു പറയാം. മുൻഗാമികളെ അപേക്ഷിച്ചു വിജയ് ഈ നില ഇനിയും തെളിയിക്കപ്പെടേണ്ടതായിട്ടുണ്ട്. ഈ മൂന്നു വിജയികളുടെയും രാഷ്ട്രീയനേട്ടങ്ങളുടെ പശ്ചാത്തലത്തിൽ ശിവാജി ഗണേശനിൽ തുടങ്ങി എസ് എസ് രാജേന്ദ്രൻ, കെ ഭാഗ്യരാജ്, ടി രാജേന്ദർ, വിജയകാന്ത്, ശരത്കുമാർ, കാർത്തിക്, കമൽ ഹാസൻ, സീമാൻ, കരുണാസ്, വരെയും നീളുന്ന തമിഴ് താരരാഷ്ട്രീയത്തിന്റെ സങ്കീർണ്ണമായ അടരുകളെ വേർതിരിച്ചെടുക്കുന്നതിൽ ടി അനീഷ് അസാമാന്യമായ ബൗദ്ധീക ചാതുര്യം പുലർത്തുന്നുണ്ട്. രാഷ്ട്രീയത്തിൽ പ്രവേശിച്ചില്ലെങ്കിലും തമിഴ് രാഷ്ട്രീയത്തിൽ ഏറെ നിർണ്ണായകമായ സ്വാധീനം ചെലുത്തിയ രജനികാന്ത് എന്ന സൂപ്പർതാരത്തെ കുറിച്ചുള്ള അധ്യായം ഏറെ കൗതുകമുണർത്തുന്നതും എഴുത്തുകാരന്റെ രാഷ്ട്രീയ നിരീക്ഷണപാടവത്തിന്റെ നിദർശനവുമാണ്. 

ഓരോ താരങ്ങളെയും അവരുടെ കുടുംബ -ജാതി പശ്ചാത്തലം, കലാപ്രവർത്തനങ്ങൾ, സിനിമയിലേക്കുള്ള പ്രവേശം, പ്രേക്ഷകരെ ആകർഷിക്കാനും നായകപദവി ആർജ്ജിക്കുന്നതിനും കാരണമായ ഘടകങ്ങൾ, താരപദവിയെ മുൻനിർത്തി നടത്തിയ രാഷ്ട്രീയ നീക്കങ്ങൾ, ഈ രംഗത്ത് ശോഭിക്കാനോ ശോഭ നഷ്ടപ്പെടാനോ ഉണ്ടായ കാരണങ്ങൾ എന്നിവ നിരത്തിയാണ് എഴുത്തുകാരൻ അപഗ്രഥിക്കുന്നത്. 

തമിഴ് ജനത തങ്ങളുടെ താരമൂർത്തികളെ അവരുടെ അടയാഭരണങ്ങൾ അഴിച്ചുമാറ്റി പ്രത്യയശാസ്ത്രത്തിന്റെയും രാഷ്ട്രീയ നിലപാടുകളുടെയും തുലാസിൽ ഭാരമളന്ന് വേണ്ടത് മാത്രം ഏറ്റെടുത്തും ബാക്കി ദൂരെയെറിഞ്ഞും തങ്ങളുടെ രാഷ്ട്രീയവിവേകം പ്രകടിപ്പിച്ച നാടകീയ മുഹൂർത്തങ്ങളെ കഥാകഥന സ്വഭാവത്തോടെയാണ് 'പരാജിത നായകർ' അവതരിപ്പിക്കുന്നത്. ഒരു ത്രില്ലർ കഥ പോലെ വായിച്ച് പോകാവുന്ന ആഖ്യാന രീതി, മറ്റു ചരിത്ര - സംസ്കാര പഠനങ്ങളിൽ നിന്ന് ഈ കൃതിയെ വേറിട്ട് നിർത്തുന്ന പ്രധാന ഘടകമാണ്.