ഓപ്പറേഷൻ തൂഫാന്’ ഐക്യദാർഢ്യം; ലഹരിവിരുദ്ധ സന്ദേശവുമായി ‘ഏക് തൂഫാൻ’;അധ്യാപകരും വിദ്യാർത്ഥികളും രക്ഷിതാക്കളും അണിനിരന്നു

ഒക്ടോബർ മൂന്നിന് മടപ്പള്ളി, ഓർക്കാട്ടേരി, വടകര എന്നിവിടങ്ങളി ലാണ് അവതരണങ്ങൾക്ക് തുടക്കമായത്. അധ്യാപകരും വിദ്യാർത്ഥി കളും രക്ഷിതാക്കളും ഒരുമിച്ച് അണിനിരക്കുന്നത് പരിപാടിയുടെ സവിശേഷതയാണ്. സൗജന്യമായി അവതരിപ്പിക്കുന്ന നൃത്തസംഗീ തശില്പം മഴ മാറുന്നതോടെ കൂടുതൽ വേദികളിലേക്ക് വ്യാപിപ്പിക്കുമെന്ന് പ്രേംജിത്ത് ചോമ്പാല പറഞ്ഞു. ലഹരിക്കെതിരായ പോരാട്ടം സമൂഹത്തിന്റെ കൂട്ടുത്തരവാദിത്വമാണെന്ന സന്ദേശം കലയുടെ ഭാഷയിൽ ജനങ്ങളിലെത്തിക്കുകയാണ് ലക്ഷ്യം.

നർത്തകൻ, കൊറിയോഗ്രാഫർ, കവി, കഥാകൃത്ത്, നോവലിസ്റ്റ്, സംവിധായകൻ, അഭിനേതാവ് എന്നീ നിലകളിൽ ശ്രദ്ധേയനായ പ്രേംജിത്തിന്റെ കലാപരമായ മികവും സാമൂഹിക പ്രതിബദ്ധതയും ഒത്തുചേരുന്ന സൃഷ്ടിയാണിത്. വിനോദത്തിനപ്പുറം സാമൂഹികമാറ്റത്തിനുള്ള ഉപാധിയായി കലയെ ഉപയോഗിച്ച് ലഹരിവിരുദ്ധ ജനകീയ പ്രതിരോധത്തിന് ഊർജം പകരുകയാണ് ‘ഏക് തൂഫാൻ’. നൃത്തസംഗീതശില്പത്തിന്റെ ടൈറ്റിൽ ലോഞ്ച് നേരത്തെ ചോമ്പാല ഉപജില്ലാ വിദ്യാഭ്യാസ ഓഫീസർ സപ്‌ന ജൂലിയറ്റ് നിർവഹിച്ചിരുന്നു.

പ്രേംജിത്തിന് ഭാരത് സേവക് സമാജ് ദേശീയ പുരസ്‌കാരം

കലാ-സാംസ്കാരിക രംഗത്തെ പ്രവർത്തനങ്ങൾക്കും സാമൂഹിക പ്രതിബദ്ധതയ്ക്കുമുള്ള അംഗീകാരമായി പ്രേംജിത്ത് ചോമ്പാലയെ ഭാരത് സേവക് സമാജിന്റെ ദേശീയ പുരസ്‌കാരം നൽകി ആദരിച്ചു. തിരുവനന്തപുരം കവടിയാറിലെ സദ്ഭാവന ഓഡിറ്റോറിയത്തിൽ നടന്ന ചടങ്ങിൽ ഭാരത് സേവക് സമാജ് ഓൾ ഇന്ത്യ വൈസ് ചെയർമാൻ ബി.എസ്. ഗോപകുമാർ, കാലിക്കറ്റ് സർവകലാശാല മുൻ വൈസ് ചാൻസലറും പ്രമുഖ ചരിത്രഗവേഷകനുമായ ഡോ. കെ.കെ.എൻ. കുറുപ്പ്, കേരള ശാസ്ത്രസാഹിത്യ പരിഷത്ത് പ്രസിഡന്റ് കൂടിയായിരുന്ന, അനർട്ടിന്റെ മുൻ ഡയറക്ടർ ആർ.വി.ജി. മേനോൻ എന്നിവർ ചേർന്നാണ് പുരസ്‌കാരം സമ്മാനിച്ചത്. പ്രമുഖ വ്യക്തിത്വങ്ങൾ പങ്കെടുത്ത നിറഞ്ഞ സദസ്സിലായിരുന്നു ആദരം.

ദേശീയ വികസനത്തിനും പൊതുസേവനത്തിനും വിവിധ മേഖലകളിൽ മാതൃകാപരമായ സംഭാവനകൾ നൽകുന്ന വ്യക്തികളെയും സംഘടനകളെയും ആദരിക്കുന്നതാണ് ഭാരത് സേവക് സമാജിന്റെ പുരസ്‌കാരങ്ങൾ. കല, സാഹിത്യം, സംസ്കാരം, കായികം, സാമൂഹിക പ്രവർത്തനം തുടങ്ങിയ മേഖലകളിലെ സംഭാവനകൾ പരിഗണിച്ചാണ് അംഗീകാരം നൽകുന്നത്.

സൗജന്യ ട്യൂഷനിൽ തുടങ്ങി കലാസാമൂഹിക പ്രവർത്തനങ്ങളിലേക്ക്

പാവപ്പെട്ട വിദ്യാർത്ഥികൾക്ക് സൗജന്യ വിദ്യാഭ്യാസസഹായം നൽകുകയെന്ന ലക്ഷ്യത്തോടെ 1995-ൽ ‘വിദ്യാകേന്ദ്ര’ എന്ന പേരിൽ സൗജന്യ ട്യൂഷൻ സെന്റർ ആരംഭിച്ചാണ് പ്രേംജിത്ത് ചോമ്പാല സാമൂഹിക പ്രവർത്തനങ്ങൾക്ക് തുടക്കമിട്ടത്. 2000-ൽ ‘കലാകേന്ദ്ര’ എന്ന പേരിൽ പ്രാദേശിക കലാസംഘടനയ്ക്കും രൂപം നൽകി.

എം.ജി. സർവകലാശാലയ്ക്കു കീഴിലുള്ള കോളേജിൽ ബി.എഡ്. പഠനകാലത്ത് കലാപ്രതിഭയായും കോളേജ് ആർട്സ് ക്ലബ് സെക്രട്ടറിയായും പ്രവർത്തിച്ച അദ്ദേഹം കലാമത്സരങ്ങളിൽ വിധികർത്താവായും സേവനമനുഷ്ഠിച്ചിട്ടുണ്ട്. ലഹരിയുടെ വിപത്തിനെക്കുറിച്ച് സമൂഹത്തെ ബോധവൽക്കരിക്കാൻ തെരുവുനാടകങ്ങളും സംഗീതസദസ്സുകളും സംഘടിപ്പിച്ചു.

നിരവധി വെബ് സീരീസുകളുടെ കഥയും സംവിധാനവും നിർവഹിച്ചിട്ടുള്ള പ്രേംജിത്ത് പത്തോളം ആൽബങ്ങളിൽ ഗാനരചനയും സംവിധാനവും നടത്തിയിട്ടുണ്ട്.

കലാപ്രവർത്തനങ്ങളെയും സാമൂഹിക ഇടപെടലുകളെയും കൂട്ടിയിണക്കി ലഹരിവിരുദ്ധ സന്ദേശം പുതിയ തലമുറയിലേക്ക് എത്തിക്കാനുള്ള ശ്രമങ്ങളുടെ തുടർച്ചയാണ് ‘ഏക് തൂഫാൻ’.

അന്വേഷണങ്ങൾക്ക്: 98957 43443