ഏഷ്യൻ ഗെയിംസ് ഷൂട്ടിങ്ങിൽ തിളങ്ങി വിദർശ വിനോദ്: 50 മീറ്റർ റൈഫിളിൽ രണ്ടാം വെള്ളി

ഏഷ്യൻ ഗെയിംസ് ഷൂട്ടിങ്ങിൽ കോഴിക്കോട് സ്വദേശിനി വിദർശ വിനോദിന് രണ്ടാം വെള്ളി മെഡൽ നേട്ടം. വനിതകളുടെ 50 മീറ്റർ റൈഫിൾ 3 പൊസിഷൻ ടീം ഇനത്തിലാണ് വിദർശ ഉൾപ്പെട്ട ഇന്ത്യൻ സംഘം വെള്ളി മെഡൽ സ്വന്തമാക്കിയത്. തിലോത്തമ സെൻ, വിദർശ വിനോദ്, ആശി ചൗക്‌സി എന്നിവരടങ്ങിയ സഖ്യമാണ് ഇന്ത്യയ്ക്കായി നേട്ടം കൊയ്തത്. വിദർശയും തിലോത്തമയും വ്യക്തിഗത ഇനത്തിന്റെ ഫൈനലിലും ഇടം നേടിയിട്ടുണ്ട്.

​ആകെ 1763 പോയിന്റ് കരസ്ഥമാക്കിയാണ് ഇന്ത്യൻ സംഘം രണ്ടാമതെത്തിയത്. 1773 പോയിന്റോടെ ഗെയിംസ് റെക്കോർഡ് കുറിച്ച ചൈന സ്വർണ്ണവും 1754 പോയിന്റോടെ കസാഖ്സ്ഥാൻ വെങ്കലവും നേടി. ലോക റാങ്കിങ്ങിൽ 15-ാം സ്ഥാനത്തുള്ള വിദർശ യോഗ്യതാ റൗണ്ടിൽ മികച്ച തിരിച്ചുവരവ് നടത്തി 588 പോയിന്റോടെ ആറാം സ്ഥാനക്കാരിയായാണ് ഫൈനലിലേക്ക് യോഗ്യത നേടിയത്. 590 പോയിന്റോടെ മൂന്നാം സ്ഥാനക്കാരിയായാണ് തിലോത്തമ ഫൈനൽ പോരാട്ടത്തിന് യോഗ്യത നേടിയത്.

​കഴിഞ്ഞ ദിവസം നടന്ന വനിതകളുടെ 10 മീറ്റർ എയർ റൈഫിൾ ടീം വിഭാഗത്തിലും വിദർശ അടങ്ങിയ ഇന്ത്യൻ സംഘം വെള്ളി മെഡൽ നേടിയിരുന്നു. വിദർശയ്ക്കൊപ്പം ഇളവേനിൽ വാളറിവൻ, മഹാരാഷ്ട്ര സ്വദേശിനി സോനം ഉത്തം മസ്കർ എന്നിവരായിരുന്നു അന്നത്തെ വെള്ളി മെഡൽ നേട്ടത്തിലെ മറ്റ് പങ്കാളികൾ.